Kwah eh U Narayanasamy ban wan sha Shillong

Shillong, 3 Naitung:
U bah D.D Lapang President MPCC mynta ka sng u la ia kynduh ia ka President ka AICC ka Sonia Gandhi ha New Delhi. Ha katei ka jing iakynduh u bah Lapang u la ai ia ka kaiphod, kaba iadei bad ka elekshon shiteng samoi ha Chokpot ha kaba ka Bluebell R Sangma ka la jop na ka seng Congress.
Ka Sonia ka la ai khublei ia u, ia ka Bluebell bad kumjuh ia ki nongtrei ka Party Congress. U la ai ruh ia ka kaiphod, halor ka jing pynrung dkhot, ha kaba ka Sonia ka la kyntu ia u bah Lapang ban un nangtrei shitom bad ban peit ba kan don ka jingiatylli hapoh ka seng Congress. U la ia kynduh ruh ia u V Narayanasamy uba dei u nongpeit ia kane ka jylla Meghalaya ha kaba u Narayanasamy u la kwah eh ban wan noh sha Shillong ban ia kynduh ia ki nongtrei Party bad ban thawlad thaw lynti ban nang pynkhlain shuh shuh ia ka seng Congress.