“Kwah burom ki Seng riewlum, ban pyni sha ka pyrthei” rOng u bah Pynshngain halor ka kam Rangbah shnong

Shillong, 5 Jymmang:
U Chairman ka Liang Pyrshah ka People Democratic Forum ( PDF) ha Khasi Hills Autonomous District Council u bah Pynshngain N Syiem u la kynthah kylla halor ka jingkhot jingialang paidbah ka HSPDP lashai ka sngi ha Madan Student, bad u la kynnoh ba katei ka dei tang ka jingkwah burom ban pyni sha ki paidbah ba ki leh eiei halor ka kam ki Rang bah Shnong, “Ka dei tang ka jingleh politik ki seng sain pyrthei ba don hapoh ka ARPA tang ban ioh burom” ong u bah Pyn shngain haba ia kren bad ki nongthoh khubor.
U la kynthah ruh halor ka jingkhot jingia lang ka ARPA ha ka 12 tarik mynta u bnai ban ia kren ia ki kam ba iadei bad ka jingshah sloit bor ki Rangbah Shnong, ha kaba u la ong ba shuwa katei ka jingialang la khot jingialang paidbah pynban tang da ka seng HSPDP marwei. “Kane ka pyni ia ka jingiapait jong ki bad ka jingbym don jingsngewthuh jingmut para ma ki” ong biang u bah Pynshngain.
Utei u Chairman ka liang pyrshah u la kynnoh ruh ba ki seng riewlum ki la sdang pynkylla Politik ia ka kam ki Rangbah Shnong tang ban pyni sha ka pyrthei ba ki leh eiei, “Ka jingiaid ki Seng riewlum la ka jong ka lynti ka la sdang ban sma Politik, tang ban pyni sha ka pyrthei ba ki leh eiei” u la bynrap biang.
Shuh shuh u la ong ba wat la ka jingialang jong ka HSPDP kan dang iaid lashai ka sngi ha Madan Student, hynrei ka PDF ruh kan pyniaid beit ia ka jingia lang jong ka bad ki riew shemphang ban ia phylliew jingmut bha halor ka kam Rangbah Shnong ka ban long lashai hi ka sngi, ha kaba u la ong ba ka PDF da lei lei ruh kan ym ia treilang bad ka ARPA halor ka jingshah sloit bor ki Rangbah Shnong namar ba ka la iohi ia ka jingiapait wat hapdeng jong ki ruh namar ka jingkwah burom.