Shillong,11 Nailur:
Ki Rangbah shnong jong ka thain Umroi myn ta ka sngi haba pynshai paidbah ba ki kyrshan ia ka jingdawa ILP ki seng bhalang, ki la ong ruh ba ka sorkar bad ka District council kim dei ban shu klun lut halade ia baroh ki bor, hynrei dei ban ai bor ruh ha ka Shnong bad ki rangbah shnong kumjuh ki Syiem ban iada ia ka jingwan tuid kyrthep ki bar jylla ha kane ka Ri.
U Bah L.R Lyngkhoi uwei na ki Rangbah Shnong na ka thain Umroi u la ong ba lada ka sorkar ne ka district Council kam lah ban ai bor sha ki Rangbah shnong ne ki Syiem, ka ILP ruh kan long hi thik kum ka Supreme Court Constitution of India Arts. 342-16-13-2006, kaba la batai shaphang ka shong kha shongman jong ki thei Khasi ia ki bar jylla kaba la shu sep ha District council khlem da pyntreikam.
“Ngim khang ia ki bar jylla ba kin wan bylla” ong u Bah Lyngkhoi uba la iathuh ba manla ki shnong ki don la ki jong ki buit kumno ban teh lakam na ka jingwan tuid ki mynder. Ha kajuh ka por u Bah Lyngkhoi uba la wan synran da ki saw san ngut ki rangbah jong kiwei pat ki dong u la ong ba haduh mynta ym pat shym la ioh sngew ba kin ia kren ILP ha District Council, hynrei tang ha ka sorkar jylla.
Haba kren sha ki nongthoh khubor ha Shillong Press Club u Bah Lyngkhoi u la ong ba mynta ka la don ka jingmut ban seng ia ka Synjuk ki Rangbah shnong jong ka thain Umroi ban leh eiei halor ka jingwan tuidd kyrthep ki Mynder ha kaba mynta kane ka jingialum jong ki ka dang shu long tang na Umiam arsut sha Nongsder. U la iathuh ruh ba don katto katne ki shnong kiba la buh ha la ki jong ki kyndon shnong .U Rangbah shnong ka Nongrah u la ong ba ha Nongrah ki la dep ban pyntreikam ia ka jing registar kyrteng ia ki bar jylla kiba wan bylla bad ki da buh por ia ki ban sah palat ia kata kim shah shuh bad kane kim shym la leh tang ia u dkhar, hynrei wat ia ki Khasi ruh kiba wan shong wai ki dei ban pynbiang ki kot ki sla kum baleh ia u dkhar.
U Bah Lyngkhoi uba lam khmat napdeng ki Rangbah shnong u la ong “Dei ban tehlakam shuwa nala ing ban ym pyllait pathar ia ka jaka shong jaka sah ia ki bar jylla” da kaba kdew lyngba ka jingtreikam shuwa na la ing lah ban teh lakam ia kane. “Ka ILP ka dei ka jingpynsah ban ithuh ia ka dak ka jinglong riewlum” pynkut u Bah LR Lyngkhoi.
Phi don ban ong eiei?