Kwah ASP ha Ri Bhoi

Nongpoh, 20 Naitung:
Ka Federation of Khasi Jaintia & Garo People (FKJGP), North Khasi Hills district, ka la pynpaw mynta ka sngi ba ka sorkar jylla lyngba ka tnat Home ka dei ban thung ia uwei u Additional SP jong ka, kumba kiwei ki district ha ka jylla ki don ia u ASP jong ki ban peit ia ka shongsuk shongsaiñ. U president ka FKJGP, North Khasi Hills district, haba pynpaw ia kane ha ki lad pathai khubor, u la ong na ka seng ka la ioh jingtip ba ka district hi baroh kawei ka dang duna bha ki pulit ki ban tehlakam ia ka shongsuk shongsaiñ, kumta na ka liang ka seng ka dawa ba ka sorkar jylla ka dei ban thung ia u ASP halor kane khnang ban wanrah ia ka bha ka miat bad ka shongsuk shongsaiñ ha baroh ki liang.
U la bynrap ruh ba ki jingeh ba bun bha ba kum ka district hi ka mad ha kine ki sngi ka dei halor ka jingbym don ki heh pulit kiba biang ban trei, khamtam ha ki jingjia kajia khappud bad ka Assam kaba ju mih man la ka por, ka seng ka dawa ruh ba ka sorkar jylla ka dei ban thung noh ia u ASP bad kumjuh ruh ban pynbun shuh shuh ia ki pulit pahara jong ka district khnang ba kiba kum kitei ki jingiakajia kin ym ktah kynsan sha ki paidbah, namar lada khlem don ki pulit pahara kiba biang, kan long kaba eh ia ka sorkar ban tehlakam ia kino kino ki jingjia ba sniew kiba ktah ia ki shnong ki thaw.