Kutnoh ka Shad Sukra ka Jowai & Tuber

Jowai, 9 Iaiong:
Ka Shad Sukra jong ka Sein Raij Tuber bad Sein Raij Jowai ka la kutnoh ha kane ka sngi Saitjain bad Sngi U Blei.
Ka Sein Raij Tuber ka la pynlong ia kane ka shad lehkmen ha Biar, Tuberkmai Shnong katba ka Sein Raij Jowai pat ka la pynkut ia kane ka tamasa ha ‘Thaw Shad Sukra, Iawmusiang, Jowai.
Ha Tuber, ki Sein Raij Shnong bapher bapher jong ka Sein Raij Tuber ki la wan ban pyni ia ki jingshad tynrai bapher bapher bad la sakhi ruh da ki hajar ngut ki paidbah.
U ma Justine Dkhar, Local MLA bad u Local MDC, u Laski Rymbai u la ong u kongsan bad Symbud kongsan ha ka jingiadonlang ka kong Violet Lyngdoh, MDC ka Rymbai ha ryngkat ki nongialam ka Sein Raij Tuber.
Katba ha Jowai pat, ka Tamasa lehkmen Shad Sukra ka la sdang naduh ka sngi Saitjain bad la pynkut ia ka ha ka sngi U Blei.
Ka Sein Raij Jowai, mynta u snem ka la rakhe ia kane ka tamasa halor ka mat pdeng, ‘Ha ki tyrpeiñ ki tympha ka Bei Rymaw, ya ki kha kti u warim u ksoh u wyrchaw’.
Da ki hajar ngut ki paid nongshong ka nongbah Jowai bad na kiwei kiwei de ki shnong ki la wan ban sakhi ia kane ka shad sukra ba shisien shisnem. Ki khun ka Sein Raij Jowai ki la iamih paidbah ban lehkmen ha ryngkat ki riam tynrai ba iphuh iphieng ha bar ki sur tynrai ba sngewtynnad.
Ka prokram kaba khadduh jong kane ka tamasa ha Jowai la pynlong ha ka por miet ha Mukoi Pyrdi, Loom Pyrdi, Iongpiah Jowai ha kaba ka la don ka shad Kper Syntu bad ka Shad Pynjaw.