Ka jingialehkai ba la tip, kum ka PUBG Mobile Club Open 2019 tournament, ka dei kaba la pynbna naduh U Lber mynta u snem bad katei kan dei ka jing ia kynduh bad ia khun jong kito ki riew ieid ia ki jingialehkai PUBG na kylleng ka pyrthei bad la khmih lynti, ba kan dei ruh ka jingialehkai kaba don ia ka buskit kaba rem dor bha.
Na India, ki don lai tylli ki team kiba shah jied na India bad kiba dei ban iakhun bad kiwei pat ki nongialehkai jong ka pyrthei, hynrei haduh mynta la sngewthuh ba kitei ki nongialehkai na India, kin nym lah ban leit satia ban iakhun sha Germany, namar ba kim pat ioh visa haduh ha kine ki sngi.
Kitei ki lai tylli ki team kiba shah jied ki long ka SOUL, TeamIND bad ka Indian Tigers. Ka Team SOUL, kan iakhun nyngkong ha ka 26tarik Naitung bad kitei ki lah ban dang pyrshang ban wad visa ban ioh leit sha Berlin.
Ki ar tylli kiwei pat ki long ka TeamIND bad ka Indian Tigers, kiba wan ba ar bad ba lai na ki nongjop na India, ki don ia ki jingialehkai jongki ha ka 20tarik Naitung bad kitei kim don lad shuh ban poi sha Germany, hynrei kitei ki lah ban iakhun na India, lyngba ka ophis jong ka PUBG, kaba don ha Nodwin bad ki donkam ruh ban ioh ia ka ping kaba kham heh, namar ba kin ialehkai ha ka European server.
Phi don ban ong eiei?