Kut por ia ki nongshalan maw, ban shim wai ia ki trok bar Jylla, ong ka KSU War Jaintia

Shillong: Ka Khasi Students’ Union War Jaintia Circle myn hynnin ka sngi, ka pynkynmaw ia ka jingialang kaba la long bad ki nong shalan maw sha Bangladesh ha ka 11tarik Jymmang 2019 ha I.B PWD, Dawki bad ha katei ka jingialang, ka la don ka jingiakut ban ai por ia ki shibnai ban beh noh ia kine ki trok bar jylla kiba wan kamai beain sha ka thain War Jaintia.
Myn hynnin ka sngi ka dei ka jingkut jong ka jingai por bad ka Seng ka kyntu sha baroh ki nong shalan maw, kiba shim wai ia ki kali bar jylla ba kin phah leit noh mardor ia ki katkum ka jingiakut bad jingkular bad ka Seng ha katei ka jingialang ba khatduh. Na ka liang ka Seng kan ym shong kli kti halor kane ka bynta kan iai bud dien ioh don ki riew shim kabu na ka bynta ka jingkhwan myntoi shimet jong ki. Ka Seng ka ai khublei ruh, sha baroh ki nongkhaii, kiba shalan maw sha Bangladesh halor ka jingiatrei lang bad ka Seng haduh kine ki sngi ba mynta, ong ka kyrwoh na u Samla Lurman B. Talang General Secretary.