Kut noh ka lympung kynjatbol Subroto Cup ha Nongstoiñ

Nongstoiñ: Ka ophis jong u District Sport Officer WKHD Nongstoiñ, hynnin ka sngi kala ioh ban pynhap pyrda noh ia ka lympung kynjatbol jong ki khynnah skul kaba la tip ruh kum ka West Khasi Hills District Level Inter School Football Tournament 2018 (Subroto Cup) ha kaba u bah K.L Nongbri DC Incharge ka WKHD u la long kum u kongsan ban pynhap pyrda.

Katei ka lympung kynjatbol jong ki khynnah skul ka la long kaba shongshit haduh katta katta ha kaba ki paidbah riew ieid phutbol na kyleng ka thaiñ bad kumjuh ki khynnah skul bad ki nonghikai jong ki skul kiba iashim bynta kila ia tuid bad pyndap smam ia ki sawdong jong ka Madan New Nongstoiñ wat ha pdeng jong ka jingpynthut ka mariang.
Haba phai sha ka jingiakhun phainal kaba nyngkong eh jong katei ka lympung ha ka U-14 Shynrang ka Marang Jaidoh Press UPS kala ioh ban khur ia ka nam kum ka lahduh hadien ba kala lah ban pynliem noh ia ka Anderson HSS da 2 kol la 0.
Shuh shuh haba bteng pat sa ka jingiakhun jong ki U-17 jong kynthei na ka liang jong ka Goel Gatphoh Memorial SS kala ioh ban khur ia ka nam jop hadien ba kala lah ban pynliem noh ia ka Sibsing Memorial Govt HSS da 1 kol la 0 katba ha ka liang jong ki khynnah shynrang pat ia ka nam lahduh la ioh ban khur da ka Littlestar hadien ba kala lah ban pynliem noh ia ka Rev. JJM Nicholsroy SS da 3 kol la 2 kol.
Na kaliang jong ka ophis jong u District Sports Officer West Khasi Hills Nongstoiñ ha ryngkat ka District Sport Promotion Society (DSPS) kala ioh ruh ban sam ia ka bai bam (Scholarship) sha ki players jong ki lai tylli ki kyrdan kynthup kynthei bad shynrang kiba la ioh ban leit ia shim bynta ha u snem 2017 ha ka State Level Competitions.
Nalor u kongsan ha katei ka sngi la iadon lang ruh u bah P.B. War Nongbri DSO ka WKHD, u bah Mt.Gordon Marngar general Secretary NDSA ki Principals, Headmasters bad Headmistresses, ki nonghikai bad kiwei kiwei kiba la ioh ruh ban sam ia ki khusnam bapher bapher sha ki nongjop.