Jowai, 16 Naitung:
Ka Lehniam Beh deinkhlam ka Sein Raij Jowai ka la kutnoh mynta ka sngi Balang ha kaba u Lat ka jylla u V. Shan munagathan u la long u kongsan ha ryngkat u Chief Justice ka Megha laya High Court, u Dinesh Maheshwari ki la long ki nongshah khot sngewbha, ki la wan ban sakhi ia katei ka lehniam ha Aitnar.
Kane ka lehniam kaba kongsan bad kaba iphuh iphieng jong ki Pnar kiba dang bat ia ka niam tynrai ka Niamtre ha Jowai ka la kut noh mynta ka sngi hapdeng ka jingshongshit shongkun bad ka jingiphuh iphieng kaba khraw.
Ia kane ka lehniam Behdeinkhlam da ki phew hajar ki paidbah na kylleng ka bri u Hynniewtrep Hynniewskum kumjuh ruh kiba na bar jylla bad kiba na ki ri nongwei Ki khun ka Niamtre ha ryngkat ki bom ki ksing bad ki Tangburi ki kynoi ki risa ha ka jingkmen ban wanrah ia ki Rot sha Aitnar- ka pung kyntang ban pyni paidbah ha shwa ban bret ia ki ha katei ka jaka.
Nalor u lat ka jylla bad u Chief Justice ka High Court ki myntri sorkar naduh u ma Sniawbhalang Dhar Myntri ka tnat PWD, ma Ngaitlang Dhar, Kong Roshan Warjri, Home Minister bad ruh u bah HRD Lyngdoh bad u bah Jemino Mawthoh nalor u CEM bad Dy. CEM ka JHADC u ma Thombor Shiwat bad u ma A. Andrew Shullai ki la wan ban sakhi ia katei ka lehniam.
La donlang ruh u Deputy Commissioner, Arun Kumar Kembhavi bad u SP West Jaintia Hills, R. Muthu nalor ki sahep sorkar bapher bapher.
Ka lehniam Behdeinkhlam hynne ka sngi ka la sdang da ka lehniam Kyntin Khnong ha iing sah ka Langdoh bud pat sa ka Bam Tyngkong kaba la pyndep da ki rangbah niam kiba kynthup ia u Dolloi kum u Khlieh ka niam ha ryngkat ka kynhun jong u kiba kynthup ia Pator, u Sangot bad u Maji.
Hadien kane, ki Wasan ki leit rung ha man la ki thliew iing ban pyndep ia ka lehniam ‘ Shoh Thyndai’ da kaba shoh bad sympat ia man ki tnum iing da ki Deinkhlam ban beh ia ki ksuid ki khrei, ia ka pang ka shitom bad ia kaba sniew baroh na ki iing ki sem. Ki Wasan ki da nguh da dem ha ryngkat i pyrnah i pyrjin ba u Tre Ki- rot un kyrkhu kyrdoh ia ka iing ka sem ha baroh ki liang naduh ka trei ka ktah bad ka koit ka khiah.
Ka bynta ba kongsan tam ka Lehniam ka la sdang ha ka nohphai sngi ha Aitnar- ka pung ba kyntang. Ha kane ka jaka ka Behdeinkhlam ka la sdang da ka jingwan ki Wasan hapoh ka jingialam u Pator ban pynlong ia ka nguh ka dem ia ka Syiem Aitnar bud pat sha ka jingwanpoi ka Symbud Khnong Blai. Hadien ka jingwan poi ka Symbud Khnong Blai, ki khon ka Niamtre ki la hiar ban shad ha katei ka pung ktieh ba kyntang.
Ki dong bapher bapher kynthup ia ka Panaliar, Dulong, Chilliangraij, Loomiongkjam, Loomkyrwiang, Iongpiah nalor ka Sein Raij Shillong, Sein Ummulong bad Ka Sein Tylli Niamtre Ladthadlaboh ki la wanrah ia ki rot jong ki ha ki dur ha ryngkat ka khubor sha ki paidbah. Mynta u snem don haduh 12 tylli ki Rot kiba la wanrah mynta u snem sha Aitnar, hadien ba la wan poi lut ki Rot la wan hiar ka Khnong Blai bad ka jingbret noh ia ki rot baroh.
Ki rot kiba la wanrah sha katei ka Aitnar ki kren ka khubor sha ki paidbah naduh ka jingiada mariang bad kiwei kiwei ki jingsniew ha ka imlang ka sahlang.
Ka Rot kaba la wanrah da ka Ummulong ka kren pyrshah ia ka jingdih kyiad bad dih sikret.
Phi don ban ong eiei?