Shillong: Ka jingleh niam ki Syiem ka Hima shillong ka ba ju tip kum ka shad Nongkrem bad pomblang myn hynnin ka sngi ka la poi sha ka ba kut ha kaba la sakhi da ki phew hajar ngut ki paidbah na kylleng ka jylla bad kum juh na shabar ka jylla kila ia tuid sha katei ka shad nongkrem ia kaba la tip ruh kum ka shad niam hapoh jong ka Hima Khyriem kaba dang neh dang sah haduh kine ki sngi kiba mynta.
Kane ka jingshad kaba la sdang naduh ka 6 tarik u Risaw bad mynhynnin ka sngi ka 7tarik Naiwieng, ha kaba ha kine ki ar sngi da ki spah ngut ki rang bad ki thei samla ki la ia mih ban ia shim bynta da ka jingkmen ha kane ka shad ba shisien shisnem jong ka Shad Nongkrem. Ki khun syiem ruh ki la ia mih ban ia shim bynta lang ha kane ka shad ka kmen ba juh long man la u snem.
Ki nongleit sakhi lang ia kane ka shad mynta ka kynti, ki long u Lat jong ka jylla u Tathagata Roy, U Chief executive Member jong ka KHADC u Bah Teinwell Dkhar bad ki Executive Member kiba la ia don lang ha kane ka sngi kut jong kane ka jingle niam ha kaba la pynkut da ka shad ka kmen.
Ha ba ia kren bad ki lad pathai khubor na ka liang U paiem Balajied Syiem, u Syiem jong ka Hima Khyriem, ula ong ba kane ka shad kaba dang neh haduh mynta ka dei ka shad “Hima Shyllong”. Hynrei dei ha u snem 1853 ba kam don shuh ka jingshong suk hapoh iing syiem kaba don ha Nongkrem kaba la wanrah ia ka jingphiah ia ka Hima Shyllong ha ki ar tylli ki hima ka “Hima Khyriem” bad ka “Hima Mylliem”.
U Syiem jong ka Hima Khyriem u la ong ba ka don ka jingong “Ia ka Hima lah ban phiah, hynrei ia ka iing sad bad ia ka niam yn nym lah ban phiah” ka kpoh Nongkrem ka dei ka hynmen bad ka kpoh Mylliem dei ka para, haba phiah ia ka hima Shyllong ia ka iing sad bad ia ka niam la ai sha ka hynmen ka kpoh Nongkrem.
Na ka liang jong u Syiem u la kren shai ba kane ka jingleh niam kam dei ka jong ka hima khyriem hynrei ka dei ka jinglehniam jong ka “Hima Shyllong” kaba la bat da ka Hima Khyriem. Ha ba shna ia ka iing sad kaba mynta khatsan snem mynshuwa ki sawkher ki dang noh ia u syniang ha ka dur jong u shrot u ba don ha kane ka iing sad.
Kane ka jingshad ka long ban dang pynneh pynsah ia ka jinglong kyrpang ha khamt jong ka pyrthei. La iathuh ba ka jinglehniam mynta u snem ka bha ka miat, kwah ba kan don ka shong suk shong sain hapoh ka iit ka hima. La iathuh ba ki briew na kylleng ka pyrthei ki wan ban sakhi ia kane ka jingleh niam.
Ha kane ka sngi na ka liang jong u Syiem u la pynpaw ruh ia ka jingsngewnguh ia ka tnad shangkai pyrthei jong ka sorkar pdeng kaba la noh syniang mynta la katto katne snem na ka bynta ban pynbit pynbiang ia kane ka jak na ka bynta ki nongwan jngohkai pyrthei bad kham ia ki nongshad.
Phi don ban ong eiei?