Kut noh ka hikai thung siej ba ar sngi ha Umsning

Nongpoh, 14 Naitung:
Ka kam thung siej ka long kawei na ki kam ba wanrah jingmyntoi bha ha kine ki sngi, lada ki nongrep ki nang ban pyn donkam ia u. U Siej u lah ban wanrah jingmyntoi kum ha ki kam thaiñ shylliah, ki lyntang thym mai ban siang ha ki ïing ki sem, ki jingsiang madan (carpet), ki jingsiang kum ki kynja lyntang ba eh, ki jingtyrsuh bniat, ki dieng jingpruid, ban shna ruh ia ki kot sada kiba la ju leh naduh kham mynshuwa. Ki nong Japan bunsien ki shna ia ki tiar jingtem (musical instrument) ban shna kum ki kynja bom (drum) bad na kine ki jingshna jong ki, kine ki jingtem bom ki pynmih ia bunjait ki sur jong ki, kaba pynshongshit ia kito kiba kwah ban sngew.
Ka prokram ai jing hikai ba ar sngi lynter, ba la pynlong da ka Ri-Bhoi Area Welfare Association (RAWA), kaba la pynkut noh hynnin ka sngi Saitjaiñ, ia kaba la pynlong ha RAWA complex, Umsning Patarim, kaba don ruh ia ka skul Sati Raja Memorial School.
Ha kitei ki ar sngi, la wan ban hikai thung siej katkum kane ka juk mynta da u SK Sharma, Consultant, bad u P.K Mandal, Asstt Manager, jong ka Cane & Bamboo Technology Centre (CBTC), Byrnihat, kaba hap ha Assam.
Ym tang ba une u jingthung u ai jingmyntoi ha ki kam khaïi pateng, hynrei lyngba kane ka jinghikai, la tip ruh ba lah ban shna bun kiei kiei kiba ai jingmyntoi ia ki paidbah, kiba naduh ki tiar ïing haduh ki tiar tem tiar put lah ban shna na ki siej, hynrei kiba ngi ngim ju tip.
Ha kane ka sngi Saitjaiñ, u SK Sharma, u la ioh ban hikai sa ban thung siej, kaba la leh practical ruh ha katei ka sngi, da kaba pom ia u tynrai siej bad sa thung ia u hadien ba la ai dawai ia u. U la hikai ruh ba ki nongrep ki dei ban ieh shuwa ia u tynrai ba la thung kumba 25 sngi ei ei, khnangba u thied jong u siej un neh skhem ha ka khyndew bad un lah ruh ban mihlung khambha.
Nalor kine kiba la ioh training, ki la don ruh kiba la wan teng ban shah hikai ba kynthup ia u Samla Banpynshai Umbah, uba la leit ban shah hikai ha CBTC, Byrnihat, uba kum u nongshah hikai, u la ioh jingmyntoi shibun eh na ki jingmut jong kane ka rukom thung siej thymmai bad kaba don ia ka jingioh nong. Ia ka jingialang ai jinghikai ha kane ka sngi la pyniaid da ka Samla Balakyntiew Umbah, Faculty Member ka RAWA, ha ryngkat ka jingdon lang kiwei pat ki dkhot ka RAWA, ki nongrep Kynthei bad Shynrang bad kiwei kiwei.