Nongpoh:Ka Tamasa Amur Falcon Festival ba shisien shi snem, kaba la pynlong kyrpang halor ka jingwan iuhkjat ki Sim Kbeit kaba la tip ha ka ktien nongwei kum ki (Amur Falcon) kaba la pynlong da ka Tyrso Valley Wildlife Protection Society ryngkat ka jingiatreilang lem bad ka Them Tyrso Women Welfare Association, ka la kut noh hapdeng kaba shongkun eh hynnin ka sngi Saitjain ha shnong Umtngam ha Ri Bhoi District.
Lah ruh ban kdew hangne, ba ha kiba kum kine ki Bnai, kitei ki sim Amur Falcon ki ju iuhkjat shisien shisnem ha ki shnong kiba don ha katei ka thain Tyrso ha Ri Bhoi bad la ong ba kitei ki sim Kbeit ki dei kiba wan naduh ka ri South Africa, ha kaba ki shong shipor ha katei ka thain bad tang katto katne por ki sa leit pat ha kawei ka jaka kaba don ha ka jylla Nagaland.
Ia katei ka Tamasa Amur Falcon Festival, la leit ban plie paidbah da u Bah Mayral Born Syiem MLA ka Nongpoh mynha ka sngi Thohdieng, ha ryngkat ka jingdon u Bah Charles Marngar, MDC ka Mawhati ki nongialam ka Tyrso Valley Wildlife Protection Society ba kynthup ia u Bah Alos Nongpoh Secretary, ki nongialam ka Them Tyrso Women Welfare Association. Katba la leit ban pynkut hynnin ka sngi Saitjain da u Bah Mayborn Rapthap ha ryngkat ka jingdon shibun ki riew rangbah katei ka thain.
Phi don ban ong eiei?