Kut ka pakhang surok miet, ym pat pynbna ia khih ki sengbhalang

Shillong, 4 Risaw:
Ka pakhang surok miet ki sengbhalang kaba la sdang naduh ka 1 tarik u Risaw kan kut lashai ka step ha ka por 5 baje, bad haduh mynta ki sengbhalang kim pat shym la pynbna eiei sa kiba kumno ki jingiakhih kin shim ban pynbor ia ka sorkar ban pyntreikam ia ka ILP. Lah ban kdew ba ki lai sngi kiba ki sengbhalang ki la khot pakhang shnong ki la treikam bha ha ka jylla baroh kawei ha kaba ki surok ki la kynjah jar ha ki kynta ka pakhang shnong.
Ym lah ban len ba bun na ki paidbah nongiew nonghat bad ki nongleit nongwan haduh mynta ki dang ia ap dngong ban tip sa kaba kumno ka jingiakhih kaba ki sengbhalang kin pynbna ha kine ki sngi, la ioh sngew sharum shaneng haba iaid lynti ba ki ia kylli para ma ki- ‘don bandh ne em lashai lashi sngi’ , kaba pyni ba kim khmih lynti ba ka bandh kan kut kat bym pat pyntreikam ia ka ILP.
Lah ruh ban pynkynmaw ba ha ki sngi ba la dep ki sengbhalang ki la pynbna ba kin pynlong da ka jingiakhih kaba khlem sangeh haduh ba ka sorkar ba la ialam da u Dr.Mukul Sangma kum u Myntri Rangbah kan kohnguh ban pyntreikam ILP. Haba phai sha ki jingkren na ka liang ka sorkar la sngewthuh ba da lei lei ruh kan ym pyntreikam da ka ILP ha kaba mynta lei ka la pynbna bad khot paidbah ban ai jingkynthoh halor ka Tenancy bill kaba ka la tyrwa ban pyntreikam ha ka jaka ka ILP.