Kut ka Lehniam Behdeinkhlam ka Sein Raij Chyrmang 

Ka lehniam Behdeinkhlam ba shisien shisnem ka Sein Raij Chyrmang – kaba dei ruh ka Sein Raij kaba ju pynlong nyngkong ia kane ka Lehniam man la u snem, ka la kut noh mynta ka sngi ha ka shnong Chyrmang.
Kane la lehniam ka la sdang naduh ka 28 tarik une u bnai ha kaba ki khon ki raiot ka Sein Raij Chyrmang ki la pyndep ia ka niam ka rukom hapoh ka jingialam ki kni ki san, naduh u Langdoh, ki wansan, ki sangot bad kiwei kiwei ki nongkit nongbah ia ka niam ka rukom.
Mynta ka sngi da ki spah ngut na kylleng ki la wan ban sakhi ia kane ka lehniam, kynthup ruh ia u MLA katei ka thain, u ma Stephanson Mukhim, u Dy. CEM ka JHADC u ma Awhoi Andrew Shullai, u President Rangbah ka BJP ha Meghalaya – u ma Shibun Lyngdoh, u Acting Dolloi ka Elaka Jowai, u ma Puramon Kynjing nalor kiwei kiwei ki kynrem ki lyngdang na kiwei kiwei ki Sein Raij.
Ka Sein Raij Chyrmang kadei lehse ka Sein Raij kaba rit eh namar ka don tang ar shnong lait noh na ka Sein Raij Mukhla bad mynta ka sngi la wan pynpoi 6 tylli ki rot sha ka pung aitnar.
Hadien ka jingbret ia ki rot ha katei ka aitnar, la pynlong ia ka ‘Iadaw Charoh’ bad ha kane ka Iadaw (Iadur) Charoh, ka phang neng kadei ban jop bad la ai lad ia ka ban jop namar la ngeit bad kadei ka kynhun kaba ieng bujli ia U Blei, lada ym shym la ailad ia ka phang neng ban jop, lane lah ban ong ba lada ai lad ia ka phangwah ba kan jop khlempep ki paid bah nongshong shnong kin iap khlam- kata ka mut kin ioh pang them, ki iap them nalor kiwei kiwei ki jingshitom ba har rukom.