Kut ka jingrakhe ia ki mrad ha ka nongbah

Shillong,  29 Risaw:
Ka tnad iada ia ki mrad ki mreng ka Wild Life Wing jong ka  Forests and Environment Department, Meghalaya  ka la pynkut noh ia ka jingrakhe ba shi taiew ia ki mrad ki mreng ha kane ka sngi Palei ha U Soso Tham Auditorium, Shillong.  Kane ka dei kaba ju rakha ha ka ri India baroh kawei bad mynta u snem ka phang ka long  ‘Im bad Ki Mrad Khlaw”.
Ha kane ka jingrakhe la pynkut da u Myntri khlaw u Bah  P.Tynsong bad u Chief Secretary Bah  P.B.O Warjri.  aba kren ha kane ka sngi u Bah Tynsong u la pynkynmaw ia ki khynnah skul ia ka jingdonkam ban iada ia ki mrad khlaw. U la ong ba ka sorkar jylla ka dang pyrshang tyngeh ban iada ia ki mrad khlaw bad ia kane lah ban pynrulong lyngba ka jingiasnohkti lang ki paidbah ka jylla khamtam ha kane ka jylla ba rukom bat ia ka khyndew ka dei jong ki riew shimet.Ym tang ban iada ia ki mrad hynrei kaba kongsan ka dei ban pynneh iaki khlaw ki btap bad na ka lianf ka sorkar kan shim ia ki lad ki lynti ban pynshai paidbah halor kane ka bynta, la ong u bah Tynsong.Katba u Chief  Secretary ha ka jingkren jongu, u la ong ba ki khlaw ki btap bad ki mrad ki mreng ki leh ia ka bynta ba kongsan ban pynneh ia ka mariang bad ka long kaba kongsan ia ki briew ban iada bad ban pynneh ia ki.Ha kane ka sngi la sam khusnam ruh sha ki nongjop ha ka jingiakop dro bad thoh ese.