Kut ka jingialehkai ki skul ka KJP Synod Sepngi ha Polo

Shillong: Ka tamasa ialehkai kaba ar kaba ar sngi ba pynlong da ka Khasi Jaiñtia Presbyterian Synod Sepngi lyngba ka Christian Education Department ia ki skul ba peit ka KJP Synod Sepngi ka la kut noh hapdeng ka jingshongshit ha kane ka sngi Saitjain.
Ïa kane ka Sports meet ba la phiah ha ki Saw tylli ki Zones kiba kynthup ïa ka Mairang, ka Nongstoiñ, ka Mawkyrwat bad ka Shillong Zone la pynlong ha ka 1 tarik bad ka 2 tarik Jymmang 2019 ha Jawaharlal Nehru Sports Complex, Polo, Shillong. Ha kane lympung ïalehkai la phiah ha ki lai tylli ki kyrdan na ka bynta ki khynnah kynthei bad shynrang, kata ki khynnah kiba hapoh 14 snem, kiba hapoh 16 snem bad kiba 16 snem shajrong.
La plie pyrda ïa kane ka jingialehkai da u Moderator ka KJP Synod Sepngi u Rev. D. Rymbai ha ryngkat ka jingïadon lang jong ki Pastor bad ki kdhot jong ka Organising Committee.
Ia ka Best Team ha ka Under 14 ha ka liang ki kynthei la iohrah da ka Skul Thomas Jones-1 Secondary School, Pyndengrei, na ka Nongstoiñ Zone, katba ha ka liang ki shynrang pat la iohrah da ka skul Presby-terian School Maweit na ka Nongstoiñ Zone.
Ha ka Kyrdan jong ki khynnah kiba hapoh 16 snem na ka liang ki kynthei la iohrah da ka skul Nongrah Presbyterian Secondary School na ka Shillong Zone bad na ka liang ki khynnah Shynrang la jop da ka Thomas Jones- 1 Secondary School Pyndengrei, na ka Nongstoiñ Zone. Ha ka liang ki khynnah kiba la palat 16 snem ïa ka nam lahduh na ka liang ki khynnah Kynthei la iohrah da ka Joel Gatphoh Memorial Synod Higher Secondary School, na Nongstoiñ Zone bad na ka liang ki khynnah shynrang la ioh rah da ka Mawpat Presbyterian Secondary School na ka Shillong Zone. Bad ïa ka Best March Past ha ka liang ki Khynnah kynthei la iohrah da ka Nongrah Presbyterian Sec. School na Shillong Zone bad na ka liang ki shynrang da ka Pyndengumiong Presbyterian Sec. School na Mairang Zone.
La pynhap pyrda ïa kane ka lympung ïalehkai da u Dy. Director jong ka Tnat Sports and Youth Affairs, u J.R. Marak uba la long u kum u kongsan ha ryngkat ka jingïadon lang u District Sports Officer ka East Khasi Hills, u Bah Daniel Dan uba la long kum u Symbud Kongsan, ki Pastor, ki nongkit kam jong ka KJP Synod Sepngi bad kiwei kiwei.