Kut ka 12 sngi, yn leit ia kynduh heh sorkar ka HANM

Shillong,20 Iaiong:
Hadien ba la kut ka 12 sngi ba ka Hynniewtreo Achik National movement, Women’s Wing ka la ai por ia ka tnad Labour ka sorkar jylla ban pynshai halor ki jingpyntip Notice kiba ka la phah sha ki dukan Khasi ba dei ban Register, ka tei ka tnad haduh mynta kam pat shym la ai jingpynshai kumba la dawa katei ka seng. Halor katei ka jingbym ioh jingshai, ka HANM, ha ka 22 tarik mynta u bnai kan leit ban ia kynduh ia ki heh sorkar ba peit ia katei ka tnad lane ia u Myntri ba dei peit ia katei ka tnad ban ia kren ia katei ka phang.
Lah ban pynkynmaw ba ha ka 25 tarik u lber, ka HANM ka la dawa na ka tnad Labour lyngba ki lad pathai khubor ba ka dei ban ai jingshai halor ka jingsam notis ia ki dukan Khasi ba kik dei ban Register ia ki dukan jong ki, ki nongialam ka HANM kynthup ia ka President kong Bity Jyrwa bad ka Secretary kong B.Sungoh ki la pyrshah ia katei ka jingsam notis, namar ba ki la kam ba ki dukan Khasi kim donkam ban register , bad donkam tang da ka jingmynjur jong u rangbah Shnong. Ki la iathuh ruh ba ia kitei ki Notice ki la sam sha baroh ki dukan naduh Nongstoin ter ter haduh ban da poi Mairang.