Shillong: Ka sorkar jylla ka la shem jingeh ban wad ia ki briew kiba la shah tep hapoh ka krem dewiong ha Lumthari ka East Jaintia Hills bad mynta ka la pan jingiarap na ka sorkar pdeng halor kane.
Na ka liang u Myntri Rangbah ka jylla u Conrad K Sangma haba kren myn hynnin ka sngi, ula ong ba u la pan jingiarap na ka sorkar pdeng ban wad ia ki briew ba shah tep hapoh ka krem dewiong kiba la jah san sngi kynthih.
“Nga la iakren ia u myntri khynnah ka tnad kam pohiing ka ri u Kiren Rijiju bad nga la kyrpad ia u ban phah ia ki stad ban wan iarap ryngkat ki tiar ba biang”, la ong u Conrad.
Kumba 13 ngut ki briew ki la suba shah tap im hapoh krem dewiong hadien ba la shlei kynsan ka um hapoh krem kaba jrong kumba 300 metre eiei ba ki rung ban tih dewiong ha ka jaka kaba khot ka Ksan ha ka shnong Lumthari, ka East Jaintia Hills ha ka 13 tarik mynta u bnai.
U Myntri Rangbah u la ong ba ka kynhun pynlait im, ka la leh ia kaba lah hynrei ki shem jingeh namar ba ka long kaba eh bha ha katei ka jaka.
Ki briew na ka National Disaster Response Force (NDRF), na ka State Disaster Response Force (SDRF) nalor ki pulit ki la pynlong ia ka jingwad ia kine ki briew haduh kine ki sngi hynrei ki shem jingeh namar ba jur palat ka um bad ka jingjrong ka krem.