Kurup tiar siat na East Jaintia

Shillong,27 Nailur:
Hadien bala ioh jingtip shaphang ka jingpyniaid tiar siat lyngba katei ka thain , ki pulit ka East Jaintia hills ki la ap thap ban ioh ban kem ia ki briew kiba donkti ban pyniaid ia kum kitei ki tiar siat, mynta ka sngi hadien ba ki la ioh jingtip kaba thikna ha ka por 6 baje janmiet ki la la beh kthong ia kawei ka kali kaba don ia u registeration number ML04B 4487 ba hadien ba ki la lap ki la ioh ban kurup ia ki tiar pynbthei na katei ka kali.
Ha katei a jingjia ki pulit ki la ioh ban kem ia ar ngut ki longkmie kiba la tip kyrteng kum ka Lucy Pamai (50) bad ka Wangdi Pamai (40) , baroh ar ngut ki dei na Dimapur, bad na ki la ioh ban kurup 400 tylli ki bom siat – dynamite (Gelatin Stick), 48 synduk ki detonator’s kiba don da ki spah tylli ki Fuse Waiar.
Hadien ba la tohkit kitei ki ar ngut ki la phla ba ki la thied ia kitei ki tiar na Jalaphet Pyrdung haka kdor T.47 hajar tyngka bad ki la phla ruh ba kitei ki tiar pynbthei ki dei kiba la thmu ban pyndonkam ha kaba shna surok. Katkum ka jingiathh jong kitei ki ar ngut ki ong ba la ki la thied ia kitei ki tiar pynbthei na u Pranai Kumar Purkayasha na ka shnong Jalaphet Pyrdung bad tang hadien katto katne por ki pulit ki la leit ban kem suk ia u.