Kurup pisa T.1klur, ki pulit Arunachal na ka kali, kaba iaid nadien ka kali U Conrad Sangma

Shillong: Hynnin ka sngi palei, ki pulit jong ka Longding, ki la ioh kurup ia ka pisa kaba T.1klur, na kawei ka kali kaba bud ha syndah jong ka kali U Conrad K Sangma, myntri rangbah ka Meghalaya. Katei ka jingjia, ka dei ha ka por 3baje nohsngi, ha ka jaka kaba ha Kanubari.

La iathuh, ba la ioh kurup ia katei ka pisa, na ka kali Fortuner, kaba don ia u number AS 01 ET 5252 bad katei ka dei ka pisa jong U Harshbardhan Singh, Executive Director jong ka Badri & Rai Construction Ltd.

U Conrad Sangma, uba dei u heh duh jong ka NPP, u don ha ka jingleit ba bun sngi jongu sha Arunachal, ban kyrshan ia ki kyrtong jongu bad kumjuh ia ki kyrtong jong ka seng BJP, namar ba ha katei ka jylla, ka don ka elekshon sha Lok Sabha bad kumjuh sha ka dorbar jylla jong ka Arunachal Pradesh.