Kurup pisa ka CBI palat T.37lak na iing U MR barim ka Manipur

New Delhi: Ka CBI ka la talasi ia ki khyndai tylli ki jaka jong lai tylli ki nongbah hadien ba la pynlong ia ka jingtohkit pyrshah ia u Myntri Rangbah barim u O Ibobi Singh bad kiwei pat na ka bynta ka jingujor halor ka jingpyndonkam bakla ia ka pisa kaba 332 klur tyngka na ka pisa kaba iadei bad ki kam bapher ha Manipur, ong ka khubor mynta ka sngi Thohdieng.

Haba ki leit khynra ia ka jaka sah jong u Singh, ka CBI ka la lap ia ka pisa kaba 11.47 lak tyngka bad ki pisa kiba rim kaba 26.49 lak tyngka bad kane ka long pyrshah ia ka ain bad kumjuh ka lah ban ialam sha ka jingshah pynshitom ka ba san sien halor ka jinglap ia kine ki pisa, ki la ong.

Kane ka kynhun ka la khynra ia ka jaka sah jong u Singh bad ka jong u IAS ophisar uba rim uba dei ruh uba don bynta lang ha ka Manipur Development Society kaba ha Aizawl, Imphal bad Gurgaon, ki la ong.
Katto katne ki tiar rem dor bad phra tylli ki kali remdor ka Audi Mitsibushi, Honda bad ka Hyundai la lap ha ka jingleit khynra ia kane ka jaka jong u Singh, ki la ong.
La kynthoh ba u Singh, uba dei u chairman ba rim jong ka Manipur Development Society (MDS), ha ka por kaba u bat ma u ia kane ka kam kata naduh ka 30tarik u Jylliew ha u snem 2009 haduh ka 6 tarik Naitung u snem 2017, ka don ka jingialeh sop sop bad kiwei pat ki briew halor ka jingpyndonkam bakla ia ka pisa jong ka sorkar kaba kot haduh 332 klur tyngka ka pisa na ka pisa kaba 518 klur tyngka ha kaba ki la aiti ha kine ki briew na ka bynta ba kin pyndep ia ka kam ba la mang halor ka jingpynbha,ong uwei na ki CBI hangne.
Ka CBI ka la pynrung ia kane ka jingtohkit lyngba ka jingkyrpad jong ka sorkar Manipur kaba la iaid lyngba ia ka Sorkar pdeng.
Ryngkat bad u Singh, ka CBI ka la jer ia lai ngut ki kyrteng jong ki Chairman barim ka MDS kita ki long D S Poonia, P C Lawmuknga, O Nabakishore Singh, baroh kine ki dei ki IAS ophisar kiba la shongthait.
U Y Ningthem Singh, uba dei u project director barim jong kane ka MDS bad u S Ranjit Singh uba dei u administrative ophisar ki la ngat ha ka FIR.
U CBI u la lap ruh ia ka 10lak tyngka jong ka pisa barim na u Ningthem Singh bad ki kot ki sla jong artylli ki iing paki dulan kaba don ha Imphal,ong ka khubor.
Kane ka kynhun ka la lap ruh ia ki tiar kiba dei trai da ma u bad ki kot ki sla jong ka bank na ka iingsah jong u Poonia, Lawmkunga bad Nabakishore.