Kurup ki pulit ka West Jaintia Hills ia ka kali kaba kit tiar pynbthei

Jowai: Ki pulit ka West Jaintia Hills District Pulit kiba don ha Raliang Police Outpost, ki la ioh ban kem ia ki saw ngut ki briew bad kawei ka kali kaba kit ia shibun bah ki tiar pynbthei.

Kane ka jingiohkem ka la jia mynta ka sngi hadien ba ki pulit katei ka Outpost ki la pynlong ia ka jingkhynra kali.
Na katei ka kali la ioh ban kurup haduh 4500 tylli ki bakor (Dynamite Sticks), 4000 tylli ki Tikli (Detonators), 4 dram ka umphniang diesel kiba la kit be-ain khlem kino kino ki kot ki sla kiba biang.

Kitei ki briew ki lah ban dei kiba pyntrei dewiong sha ki thain Umrangso ka Jylla Assam.

Haba iakren bad u SP ka West Jaintia Hills, u Bikram Marak u la ong ba ka jingtohkit ka dangiaid shakhmat um pat lah satia ban ai ia ka kyrteng jong kitei ki saw ngut kiba la shah kem. Hynrei u la iathuh ba la ujor mukotduma ia ki hapoh ki kyndon jong ka Explosive Act bad ka iing bishar ruh ka la ai bor ia ki pulit ban tohkit ia ki haduh saw sngi kynthih.