Kurup ki pulit ka West Bengal, ia ka khung tyngka, na ki 3ngut ki MLA ka Jharkhand

Kolkata: Ki pulit jong ka West Bengal, ki la ioh kurup ia bun bah ka khung tyngka na Howrah district, hynnin ka sngi, na ka kali, kaba ki don lai ngut ki MLA jong ka seng Congress na Jharkhand, ha kaba la don ka jingsuba kaba jur, ba kitei ki dei ki MLA, kiba la shah thied ha ka BJP bad katei ka dei ka pisa, ban pynhap ia ka sorkar synrop jong ka Jharkhand Mukti Morcha bad ka Congress ha katei ka jylla. Ki lai ngut ki MLA, kiba don ha katei ka kali, ki long U Irfan Ansari, U Rajesh Kachhap bad U Naman Bixal Kongari bad kitei ki la shah bat ha ki pulit jong ka West Bengal, na ka bynta ban tohkit halor katei ka jingkit pisa jongki.

Ka kali kaba ki shong, ka dei ka Toyota Fortuner SUV, bad kaba thoh ‘Jamtara MLA’, lane kaba dei ka kali jong U Irfan Ansari. U Kachhap, u dei u MLA na Khijri, u Kongari na Kolebira. Kitei ki MLA, kim pat shym la ai jingtip eiei ruh em, halor katei ka jingjia, hynrei ka Congress, ka kynnoh, ba katei ka dei ka pisa kaba la siew da ka BJP, ba kin pynkhyllem ia ka sorkar jong ka Jharkhand Mukti Morcha bad ka sorkar Congress, ong U Bandhu Tirkey, Working President ka Jharkhand Congress.

U Aditya Sahu, nongialam ka seng BJP ha Jharkhand, u lam ba katei ka dei ka pisa jong kane ka sorkar JMM-Congress bad u ong “Naduh ba ki wan ha ka bor synshar, ka bamsap ka la jubor bha bad ki pyndonkam da ka pisa paidbah, na bynta ki jingdonkam ba bun jongki”.