Kurup ka tnat khlaw 6 Metric Ton u rnga beain na Laitdom

Shillong, 25 Nailur:
Ki heh sorkar jong ka tnat khlaw jong ka Khasi Hills (Territorial) Division Shillong, ki la ioh kurup 6 MT u rnga uba la thang beain na Laitdom West Khasi Hills, ha ka sngi saitjain ba ladep. Saw kynhun ki nongtrei jong katei ka tnat, ki la leit sha Mawlangsu, Mairang bad Rambrai bad ki la ioh kurup ia u rnga ba la thang tuh ha Laitdom.
Ka jingleit swait ba khah khah jong katei ka tnat, ka la pynlong ia ki nongthang rnga, ba kin sangeh noh ia katei ka ka kam, ha kaba ki la don shibun kiba la shah kem ha u bnai Jylliew bad Naitung. La iohi ruh ia shibun ki thliew rnga, ba la iehnoh ha ki bynta jong ka Mawlangsu bad ka Mawkohie.
Na ka liang jong U DFO Khasi Hills (Teritorial) Division, ula pyrshang tyngeh ban khanglad ia katei ka jingthang rah beain bad ka ophis, ka don mynta ia 8 tylli ki kynhun kiba iaid ban swait ia kiba shalan rnga tuh bad haduh mynta, ki la ioh ban kurup ia 130MT u rnga na West Khasi Hills bad Ri Bhoi, naduh ba la khynra ha U Jylliew bad U Naitung 2016.
Katei ka kynhun, ka la ioh kurup ruh ia 50tylli ki trok, kiba kit rnga beain naduh U Kyllalyngkot 2016. Kitei ki trok, ki la shah kem, namar ba ki pynkhein ia ka hukum jong ka Supreme Court, kaba ha u snem 2008. Ka don ruh ka jingleit talasi kaba kyndit ha ki jain sain nar, ban nym shah ba kin thang da u rnga, ha ki kam jongki.
Ka ain jong ka sorkar, ka khang ban thang bad die rnga, katba kum ka ain kaba ki la thaw ka Meghalaya Charcoal (Control of production, Storage, Trade and Transit) Rules, 2008. Ha katei ka ain, la bthah ia ki nongthang rnga, ba kin ioh jingbti na ka ophis jong U DFO (Territorial). Kino kino kiba leh pyrshah bad kiba pom dieng ban thang rnga, kin ngat ha ka jingshah set phatok, kaba hynriew bnai lane ka kuna kaba T.500 lane baroh ar ki jingshah pynshitom.