Kurup ka tnad Forest, 2 trok ki dieng ba thmu khaii be-ain

Jowai, 12 Iaiong:
Ka tnad Forest ha Jaintia Hills ka la ioh ban kurup haduh ar trok ki dieng kiba la dep ot kiba la kit na ka bynta ban khaii tuh sha jylla Assam. Ia kitei ki ar trok ki dieng kiba la kit da ka trok 10 bad 12 shaka la ioh bat nyngkong da ka seng FKJGP, katba ki dang wan na thain Iooksi ha ka miet sngi Thohdieng.
Kitei ki dieng kiba shongdor haduh 2 lak tyngka shitrok katkum ka dor sorkar ki kynthup ia ki dieng met (dieng Makri Sal) bad ki dieng kseh bad lada die ha iew, kin shongdor haduh kumba 6 lakh tam eiei.
Katkum ka jingiathuh u Dr. GH Chyrmang uba dei u Divisional Forest Officer, Jowai Division u la iathuh ba kitei ki trok ki la wan kit ia kitei ki dieng na Iooksi bad ki dei kiba dei trai da u ma Habahun Dkhar na Sahsnianng. “Kitei ki dieng kiba la dep ot be-ain ha ki kharkhana be-ain ym lah ban shalan ha katei ka rukom namar katkum ka rukom ki dieng tylli (round log) dei ban ot tang ha Industrial Estate kaba don ha Khliehtyrshi”, la iathuh u Dr, Chyrmang.
Ki driver jong kitei ki trok (AS01 DD 7891 bad AS01 DD 6537) u Nirmal Kr Das bad u Md. Narul Amin ki la iathuh ba ki la kit ia kitei ki dieng na Iooksi bad kin ioh challan ynda ki la poi ha Mookyndur. Ka jingioh Challan na Mookyndur ka la pynsuba jur ruh ba ki briew jong ka Industrial Estate ki donkti ban die tuh ia ki Challan sha kito ki Nongkhaii dieng.
Na ka liang ki Officer ka tnad Forest ha Meghalaya kim lah ban kem ia kitei ki trok namar ba ka Meghalaya Forest Regulation Act kam shym la aibor ia ki. Katba bun ki trok kiba shah kem sha thain Block ki shah kurup ban dieng bad kali ha ki briew jong ka Assam Forest.
Na ka liang u ma C. Najiar u Range Forest Officer u la iathuh ba ka long kaba shitom bha ban ioh kem ia ki trok kiba kit ia ki dieng ban khaii be-ain namar ba la tapmoh beit da ki Tarpalin.