Kurup ganja ki pulit, na kawei ka kali ha Pahammawlein

Nongpoh: Hynnin ka step ha ka por 6:45 baje ei ei mynstep, ki Pulit ka Byrnihat Police Outpost ha ryngkat ka jingiarap ki riew paidbah na katei ka shnong, ki la ioh ban bat ia kawei ka kali ka kali kamai (Tourist Taxi) kaba don ia u number ML-05-J-5714.

Katei ka Tourist Taxi, ka dei kaba la niah da u Bah Pyndapbiang Marwein, ha kaba katei ka kali ka dang don ha ka lynti ban hiar na Shillong sha Guwahati, hynrei haba la poi ha katei ka jaka, ki la shah bat noh ha ki Pulit bad haba la pyrshang ban talasi ka katei ka kali, la lap pynban shibun u Ganja.

Hadien katei ka jingioh kem ia katei ka kali kit Ganja, ki Pulit ki la pyndep ia baroh ki jingdonkam kiba katkum ki kyndon Ain NDPS bad hadien kata pat la rah noh ia u nongniah bad ia katei ka kali sha Byrnihat Police Outpost. Haba iadei bad katei ka jingiohkem Ganja na katei ka kali, ki Pulit kin dang pynlong ia ka jingtohkit, khnang ban lap ia kiwei pat ki briew kiba donkti ha katei ka kam beain.