U myntri rangbah duh jong ka Iraq, u kren kob mynta ka sngi, ba ki shipai jong ka sorkar Irag, ki la kurup biang ia ki jaka, kiba ki la duh ha ki ehrang ISIS, haba ha ki khyndiat sngi ba ladep, ki shipai Iraq, ki la shah rem noh, ha ki ehrang Sunni, ha ki bynta ba shatei jong katei ka Ri.
U Nouri al-Maliki, uba la bat ia ka bor synshar ha katei ka Ri, naduh u snem 2006, u kren ha ka prokram telebishon, u ong ba ka jingduh, kaba la jia ha ka taiew ba ladep, ka la iarap ban ai bor ia ka Iraq, ba kan ioh ia ka jing ia tylli kawei jongka.
“Ngi la nang lah ban pyndem ia ki riew ialeh pyrshah bad mynta, ngi la sdang ia ki kam ia leh pyrshah jongngi, ha kaba ngi la lah ban pynphai dien ia kitei ki riew ehrang” ula ong.
La iathuh ba mynta ki shipai, ki la ioh kurup biang ia ka nongbah, kaba don ha khappud bad ka Syria, kaba la knieh da ki ehrang ISIS ha ka Lah Sngi U Blei bad kam dei tang katta, hynrei la iathuh ba ki shipai, ki la kurup biang ruh ia ka ktem par umphniang kaba don shatei ha Baiji, ha kaba la kam da u nongai ktien jong ki shipai, U Lt General Qassim al-Moussawi. La iathuh ba 40ngut ki nongialeh pyrshah, la ioh ban pyniap, ha ka jingialeh, ha ka miet sngi hat majai bad ha ka step jong ka sngi balang.
Ha kawei pat ka khubor, la iathuh ba ki don 40ngut ki nongtrei kompeni, kiba na India, kiba la shah rahbor na ka nongbah Mosul, ha kaba la rah bor da ki ehrang Sunni bad haduh mynta, ym shym la don ka jingdawa pisa ne ym shym la tip ruh, haei ba kitei ki nongtrei ki don.
Kitei kiba shah rahbor, ki dei kiba na Punjab bad ki dei kiba trei ha ka kompeni jong ka Tariq Noor Al Huda. La iathuh ba ki don kumba 100ngut ki nong India, kiba trei ha kitei ki jaka ba la synshar da ki lehnoh Islamic State of Iraq and the Levant (ISIS) bad ka India, ka dang wad jingtip, ia kitei ki briew kiba don ha kitei ki jaka, ba kynthup ruh ia 46ngut kiba trei kam nos, ong ka khubor.
Phi don ban ong eiei?