Hynnin ka sngi, ngi la pynmih ia ka khubor, ba U Raphael Samuel, ha kaba ula byrngem ban ai mukotduma ia la ka kmie bad u kpa, ba ki kha ia u, khlem da ioh lypa ia ka jing mynjur jongu.
Mynta pat sa ka kmie jongu, ka la jubab kylla ha ka peij jongka, ha ka Facebook, ha kaba ka la kylli, ba ha kano ka dur, kan kylli shwa ia u, haba ia u ruh ym pat kha.
Ka Kavita Karnad Samuel, ka ong ba ka sngew kmen shibun eh, lada jia ba ka shah kynnoh, ba ka la leh bakla ruh, hynrei ka kwah pat ba u khun jongka, un jubab ba ha kano ka dur, kan pan jingbit shwa na u, haba wat ia u ruh ym pat shym la kha satia.
Hynnin ka sngi, U Samuel (27), uba na Mumbai, u shim ba ka long kaba bakla ban kha ia u khun, u bym mon satia ban im ha ka pyrthei, ha kaba u ong ruh ba ka jingkha ia u, ka dei na ka jingsngew bang jong ka kmie bad u kpa jongu.
Ka Kavita, ka ong shuh shuh “Nga sngewnguh shi katdei, ba u khun jongnga, un mudui sha kashari ia la ki kmie ki kpa, haba ula tip ba mangi baroh arngut, ngi dei ki riewsaid ain”. “Lada U Raphael, un ai ia ka daw, ba ngim shym la pan jingbit lypa satia na u, kumta ngan pdiang ba nga la bakla”.