Kumno lada ioh surok ba bha shwa ka Khristmas, kylli ka BJP

Shillong: “Naduh ki nongiaidkai step haduh ki khynnah skul, kiba leit trei leit ktah haduh kiba leit iew leit hat, mano mano ba iaid ba ieng ha ki surok ha sor Shillong ki mad beit ia ka jingeh namar ka jingsniew palat ki surok. Kum ban shu kdew ba jan baroh ki surok ka sor Shillong bad khamtam eh ki rurok ha ka thain Nongthymmai, Garikhana, Demseiniong ki la nang sniew na ka jingtih ka bym i kut shuh kaba la pynthut ia ka leit ka wan jong ki paidbah haduh kala pynlong ia ka tnad traffic ban pyndap hi dalade ia ki thliew kumba la paw ha ki lad pathai khubor khamtam kum ha kane ka por Khristmas kaba dei kawei na ki aiom bakhraw na ka bynta ki khun khristan ha kylleng ka pyrthei bad kumjuh ha kane ka jylla” ong ka kyrwoh jong ka seng BJP.

Da kaba shim khia ia kane, u vice president ka seng BJP Meghalaya u Wankitbok Pohshna u buh ka jingkyrpad ia ka sorkar jylla ba ka dei ban shim khia wut wut ban pyllait ia ki paidbah na ki jingeh namar ka jingsniew palat ki surok ha ki shnong ki thaw khnang ba ka jinglehkmen khristmas kan long kaba shnongkun ym tang ban shu ia khuslai na ka jingbymbiang ki surok.

U bah Pohshna ha ka kyrwoh ula ong ba “Ngi sngewthuh ba kam long kaba suk ban khanglad ia ka jingsniew ki surok ki lynti syngkien namar ka jylla Meghalaya ka ioh ia u slap ba bun tam ha ka shisnem. Hynrei lada mon hi ka sorkar ka lah ban shimkhia ban saindur janai ia ka rukom shna surok bad ha kano ka rukom yn lah ban lait na ka jingjot khari khari. Ka party BJP, ka sngewdei ba ka sorkar jylla ka hap pynbiang noh da ka kynja song pisa ba la mang lypa ban pynlut marmar ban maramot ia ki surok man ka por haba don ka jingjulor la kadei kaba rit ne kaba heh. Ka long kaba sngewlyngoh haduh katta kattta ba kat haduh mynta khamtam hadien ka jingdon jong ki kor ki bor ba thymmai, ka tnad badei peit ia ki surok kam pat don ia ka rukom treikam kaba janai ban khmih bniah ia kum kine ki jingjia khamtam ban lait na ka jingjlan ban ioh jingmynjur na ka sorkar ban maramot ia ki jingjulor kiba rit, namar lada shu ieh ia ki jingjot jingpeit barit, ka lam pynban sha jinglut bunshah lada leh bymsuitniew naduh basdang kumba ong hi ka ktein phareng, a stitch in time saves nine”

Kum kawei na ka party kaba long dkhot ha ka sorkar MDA, ka BJP Meghalaya ka long barabor kaba kloi ban iatreilang bad baroh ki party kiba sngewiahap jingmut khnang ba ka jylla kan nang kiew nang bha ha baroh ki liang. Namar tang da ka jingiatreilang, ngin sa lah ban pyntikna ba kin nym don shuh ki thliew ha ki surok nangne shakhmat bad ka leit ka wan ki paidbah kan aaram khamtam kum lei ha kane ka por aiom khristmas” la bynrap u vice president ka party.