Shillong:Haba u nong lum khubor jong U Rupang, u pyrshang ban lum khubor ia ka jingkiew dor ki mar bam na ki nongdie dukan bad ki mahajon ki la pynpaw ba ka jingkiew dor ki mar bam khamtam ka um phniang bam ka dei ka ba jia ym tang ha ka jylla hynrei kaba jia ha satlak ka pyrthei.
Haba pyr shang ban kylli ki la ia thuh ba ka dor ka jong ka umphniang bam ka poi mynta kumba 152-160 shi liter bad na ka liang ki mahajon, ki ong ba ka jingkiewdor ki marbam ha Shillong ka lah ban kiew na ka daw ka jingpyrkhing ka sorkar ia ki kali wan pynhap mar ha Shillong.
Na ka liang ki Mahajon ha iew, ki la pynpaw ba ka hukum ka sorkar kaba pyn mih ha ka 3 tarik u Lber NO.P15/1/2/2022/10 kaba hukum ia ki kali kitmar ha iew ba ki dei ban pynhap ia ki mar tang naduh 9 baje mynmiet haduh ka por 7 baje mynstep kan buh jingeh ia ki, namar kin ym ioh daju ne nongtrei satia kiba lah ban trei bad miet bad sngi bad lada ki trei miet ruh ka bainong kan dei palat mar shi teng ban ia ka bai bylla mynsngi.
Na ka liang ki mahajon ki la iathuh ba ha ka shisngi, la kumno kumno ki mar kiba poi ha iew Paltan Bazar ha uwei u mahajon kan dei 3 ne 4 tylli ki trok bad ki la ong shuh shuh ba ka long kaei kaei kaba ym lah long, na ka liang jong ki ban pynhap ia ki mar na ki 3 ne 4 tylli ki trok lada ki daju kin sdang trei naduh ka por 5 baje mynstep haduh 7 baje namar kiba bun ki daju, ki dei kiba sah sha ki jaka ba la pajih na sor bad la kumno kumno kin hap mih na iew shuwa ka 6 baje bad kin ym ioh kali satia ban wan sdang trei naduh ka por 4 ne 5 baje mynstep.
Kane ka hukum ka sorkar, ki la bynrap kan ktah nyngkongeh ia u paidbah, namar kan don ka jingduna ki marbam ha iew bad kane kan pynlong ia ka jingkiew dor ki marbam, namar la kumno kumno ha ka shisngi kin lah ban pynpoi mar tang kawei eh ka trok na kaba ki ju pynpoi 3-4 trok mynshuwa.
Shuh shuh na ka liang jong ki katto katne ki mahajon ki la iathuh ba na ka liang ka Meghalaya Chamber of Commerce and Industries, ki la wan kynduh bad ki ophisar ba kin pynkylla ia kane ka rai ba la kumno kumno kan shah ia ki trok ban pynhap ia ki mar tang haduh ka por 10 baje mynstep bad ban pynjari No Entry pat ia ki trok kitmar kiba dang mut wan pynpoi tiar sha iew ha ki kynta long skul ne long trei khnang ba ka jingpoi ki marbam kan ym duna khnang ba ka dor ka mur jong ki kan ym kiew, hynrei ki la iathuh ba na ka liang ka sorkar ka la kyntait ban sngap ia ki jingai jingmut jong ki.
‘Lada kiew ka bai bylla ki daju ngi hap pynkiew ia ka dor ki mar, lada kiew ka bai kali ngi hap pynkiew ia ka dor ki marbam bad kane kan ktah beit beit ia u paidbah’ bynrap shuh shuh ki mahajon.
U National Vice President ka National People Party (NPP) u ba long ruh u Symbud Myntri rangbah ka jylla u bah Prestone Tynsong u la ong ba u don ka jingkyrmen ka ba skhem ba ha u snem 2023 ka party kan lah ban ioh ia ka jingjop na baroh ki Constituency ha Rilum Jaintia .
kane ka jingkren jong u Vice President ka party u bah Prestone Tynsong ka long mynta ka sngi haba pdiang sngewbha ia u bah Nehlang Lyngdoh u la shim ia ka rai ban pyniasoh sha ka party NPP ka ba la long ha ophis treikam jong ka party NPP.
Ha ba kren ha kane ka sngi na ka liang u bah Tynsong u la ong ba “Ka party NPP kat ba dang mih ki bnai bad ki sngi ka dang kiew irat na ka jingpyniasoh ki nongialam batbit sha ka party bad kane ka dei ka bynta ka ba lai ka ba ngi la ioh ban pynlong ia ka jingialang ban pdiang sngewbha ia ki nongialam ki ba la wan ban pyniasoh sha ka party bad kum kine ki jingialang kin dang bun nangne shakhmat namar ki ba bun ki nongialam ki ban dang wan ban pyniasoh sha ka party”.
U la bynrap shuh shuh ba “ka wei ka thong ka ba na ka liang ka party ka buh bad kata ka long ba ngi kwah ban pynkylla dur ia ka jylla Meghalaya baroh kawei ,ha kaba kane ka jingkylla dur la lah ban iohi lyngba ka jingai ka jingshakri jong ka sorkar MDA ka ba la ialam da ka party NPP mynta ka saw snem tam”.
U Vice President u la ong ruh ba “wat la ka party ka la ai ia ka jingshakri ka ba biang tam ia ka jylla hynrei ki ba bun ki jingshah kynnoh pyrshah ka party NPP kadon wat la kine ki jingshah kynnoh baroh ki dei tang ki nia ba khlem nongrim ,bad na ka liang ka party kat ba ki dang kynnoh kat ba ki dang kren bein katta kan dang ai mynsiem ia ngi ba ngin ai ka shakri ka ba bha tam ia u paidbah”.
U bah Prestone u la ong ba “Nga don ka jingkyrmen bha ia ka East Jaintia Hills bad ka West Jaintia Hills ba ha u 2023 mano ba lah ban tip ba ka party NPP ruh kan lah ban pynwan biang ia ka History ,kum ba la long ha ka to ka por ia ka party UDP ka ioh jingjop 7 na ki 7 bad lehse na ka party NPP ruh mynta ka kynti kan lah ban jop kumne “.
U bah Tynsong u la kyntu ba ka ba donkam ia ka party ban poi sha ka thong ka long ban leit sha u paidbah ban pynsngew ia ki agenda jong ka party , ba lada ka party NPP kan poi biang sha ka bor kumno kane ka party kan ai ka jingshakri sha u paidbah.
Phi don ban ong eiei?