“Kumno ban duwai?”

AIS Suja

Ka jingduwai ne Prayer, ka mut ka jingpan ne kyrpad ne pyntip ne iathuh
sha u Blei ia kiei kiei kiba u briew u sngewdonkam.

Ka dei ka jingiakren ne iasaid bad u Kpa uba ha bneng. uwei pa uwei u briew u donkam ka jingiakren bad la ki para briew, katno tam ban iakren bad u Blei ha jingduwai?

U briew ne ka briew ki donkam ban iakren ne ban pan ei ei na ki kmie ki kpa, ki pan naduh ka dohnud. Bad ym ju sngew ba uta u khun haba u pan un da pnah ktien pnah thylliej ban da pynkulmar ia u Kpa ne ia ka kmie. Kane ka long kumjuh bad u Blei. Dei na kata ka daw u Jisu u ong – “Haba phi duwai, wat bun ktien biej kum ki Jentil, naba ki mut ba yn sngew ia ki namar kaba bun ktien jong ki” Mathaios 6:7. U Blei un ym sngap ia ka jingbunktien ne ka pnah ktien pnah thylliej, ki mut ba ki briew kin sngew ia ki ba ki iastad duwai. Ade bah ka jingduwai jong phi hynne la hap bad sla dieng sla prew te, hynrei u Blei pat ym sngew ei ei.
Bunsien, balei bym ioh jubab haba duwai? Dei namar ngim duwai ha u Blei hynrei ha ki briew. U briew u duwai – u pan u pyntip, hynrei ym naduh ka dohnud hynrei tang na rmiang shyntur. U Jisu u ong, “Haduh mynta phim pat pan ha ka kyrteng jong nga: To pan, te phin sa ioh diang” Ioanis 16:24. Bunsien ngi duwai, bunsien ngi pan hynrei ka dohnud pat ka eh maw, ka rmiang shyntur te ka khih, ka dohnud pat ym lah pynkhih ba ka eh maw ha khmat u Blei.
U Jisu u ong – “Kine ki briew ki wan hajan jong nga da ka SHYNTUR jong ki bad ki burom ia nga da ki rmiang shyntur jong ki hynrei ka DOHNUD JONG KI KA JNGAI na nga” Mathaios 15:8.
Haba duwai, dei ban don ka jingngeit kaba skhem. “Lada phi don jingngeit phim sngew artatien, phin ym leh tang kata kaba nga la leh ia u Diengdumbur ……. Ia kiei kiei baroh kat kaba phi pan HA KA JINGDUWAI DA KABA NGEIT, phin pdiang” Mathaios 21:21-22.
U Jisu u ong shuh shuh – “Haduh mynta phim pat ju pan (phim pat ju duwai) ei ei ruh ha ka kyrteng jong nga: To pan (to duwai) te phin sa ioh diang” Ioanis16:24.
Balei u Jisu u ong kumta? Dei namar ba bun kiba duwai kiba pan hynrei ym ioh diang namar ba pan bym dei. Ka mut, ka shyntur te ka pan ka dohnud ka kyrngah, kum u ksew kohnguh ka khlieh kyrngah ka tdong. U Jisu u iohi ia kine kiei kiei baroh ha u briew, bad dei na kata ka daw u ong “Haduh mynta phim pat ju pan”
Ban shu pan kam long kaba suk. U para briew ia u para briew ruh u hap ban da bishar shwa la ka dei ban ai ne ym ai haba u pan ioh ba u long uba kumno kumno. katno tam u Blei. U Blei um ai kulmar u bishar shwa ia ka dohnud u briew. “Namar kiei kiei kiba mih na ka shyntur ki mih na ka dohnud, bad ka pyntngit ia u briew. Na ka dohnud ki mih ki jingmut bymman, kaba pyniap kaba klim, kai kynthei, tuh, sakhi lamler, kren bein, bad kumta ter ter. Kine ki pyntngit ia ka dohnud u briew” Mathaios 15:18-19.
Te lada ka dohnud ka tngit, ym don jaka ia u Blei. Dei na kata ka daw bunsien la shu ia duwai tang ban dep tang rukom bad ka jingduwai kam trei kam, u Blei um iohsngew. Kumta, katkum ka ktien u Blei, u briew u dei shwa ban don ka jingpynkhuid ia la ka dohnud: U David u duwai kumne: “To khmih thuh ia nga Ah Trai, to tynjuh ia nga, to iit ia ki khyllai jong nga bad ia ka dohnud jong nga” Salm 26:2. Nangta u duwai – “Wat kynmaw ia ki pop ka jinglong samla jong nga, lymne ka jingryngkang jong nga katba kum ka jingisynei jong me” Salm 25:7.
Hangne, u David u pynrit ialade bad duwai ha khmat u Blei da kaba pan mab. Hynrei te u Blei un ym sngew lada shu duwai kumto khlem da iasuk shwa bad u. Sa kawei u David u duwai – “Ah Trai to mab noh ia ka jingbymman jong nga” salm 25:11.
Haba ka dohnud ka beit ha khmat u Blei, u Blei u iohsngew ia ki jingduwai la ka long shi kyntien ar kyntien ruh da ka jingngeit. “Naba u Kpa (Blei) jong phi u tip ia kaei kaei ruh ba phi donkam mynshuwa ba phin pan na u” Mathaios 6:8.
Kumta, ka jingduwai ka dei ban long kaba mih na ka dohnud u briew ym kaba shu ia bud tynneng ne da kaba spel ia kajuh shi kajuh, hynrei ha ka jingialam u mynsiem u Blei kein. Haba duwai na ka dohnud u Blei u sngew u Mynsiem u Blei u trei, ka jubab ka wan, wat ki kambah ki jia. Haba duwai na ka dohnud, wat u Mynsiem u Blei ruh u iarap ia ka jingtlot jong ngi namar kaei ngin duwai kat ban biang ngim tip shuh hynrei uta u Mynsiem hi u kyrpad na ka bynta jong ngi ha ki jingud hir hir ……. Katba kum ka mon u Blei” Rom 8:26-27.