Kumba long mynta ka jingpynpoi bad dawa ïa u drok ka long laitluid, ong U MLA

Shillong:”Nga pynpaw ïa ka jingpyrshah bad ka jingpynrem halor ka jingjia ha ka 06 tarik u Naiwieng 2023 halor ka jing ïadie ïathied ha kaba ïadei bad u drug haba shit haba shai la kum ba die kwai die sikret khlem don jingtieng ne burom shuh, kumba la ïohi ba kadei ha ka jaka mar pyrshah ïa ka Bhutia Market kaba don hajan Sweeper Line, ha kaba nga ngeit ba baroh ngi la ïohi ba lah saphriang ha ki Social Media bad kane kan long ka thma pyrshah ïa u Drug,” ong u MLA ka 17 North Shillong konstitwensi u Bah Adelbert Nongrum.

U la ong ba ha kaba nyngkong u la ai ka jingïaroh ïa ki briew jong ka aiñ kiba la pyrshang ban trei shitom na ka por sha ka por bad la sakhi ïa ka jingïoh kurup ïa kine ki jingdih buaid na ki kali paidbah, na ki kali sorkar ka ban wanlam ka jingduh jingshaniah balei ki jia kumne.

“Ka Sorkar kadei ban shim kyrkieh ïa ka jingkit khlieh ba kumno ban pynkhlaiñ ïa ki tnat pulit bad ban pyntreikam da ka buit thymmai ban phong da ki riam kiban nym pynithuh ïalade ba kidei ki briew jong ka aiñ (plain clothes) bad ban pynkhlaiñ ïa ka jingïaid syntiat (patrolling). Ka Sorkar kadei ban shim kyrkieh kloi kloi ban pynkhlaiñ ïa ka Narcotic Act kaba long synjor kumba long mynta. Haoid khlem pep kan dei ka jingïatreilang na baroh ki liang, hynrei ka Sorkar kum ka Kmie kadei ban pyntreikam pyrkhing ban khang lad ïa ka jingwan rung laitluid jong kine ki jingsniew sha kane ka jylla ka jong ngi,” u la ong.

U la bynniaw ruh da kaba ong, “Kan long leh noh ei bad sep ei lada ngi trei bor bah napoh hynrei ka jingpyrkhing pat kam don, ki jingsniew kin nang ïoh ban rung laitluid kum ban pynkynmaw ha ki por jong ka Covid-19 la don ka jingpyrkhing ïa ki briew baroh shuwa ban rung sha ki jylla ban hap ban pyndep shuwa ïa ki kyndon ha Byrnihat entry check – gate bad lada ka Sorkar ka don ïa ka jingkitkhlieh ïa la ka jong ka jylla bad khamtam ka jingieid ïa ki khun samla, kan pyntreikam kumjuh na ka entry check-gate Byrnihat, lym kumta kane ruh kan long kum kawei pat ka khlam kaban ym lah ban ïoh ïa ka dawai ban pynkhiah, lyngba kane nga ngeit ngin lah ban pynduna, ngin lah ban tehlakam bad ban pynsangeh (reduce, control & stop), namar kumba ka long mynta ka supply bad ka demand ka long laitluid,” ong u Bah Adelbert Nongrum.