Nongpoh: Tang mar ia ioh jingtip ba u Chandan Chatterjee, National President ka All Bengali Youth& Student Organisation (ABY&SO), u la thmu ban leit jngoh sha Ichamati, kata katkum ka tarik kaba u la buh ha ka 21 tarik, kumta ban pyrshah halor katei ka jingthmu leit Itchmati da u Chandan Chatterjee, mynta ka sngi ki nongialam ka KSU, North Khasi Hills District, ki la leit ban ap ha ha Toll Gate Pahammawlein 20mer bad kata ka long ba khanglad ia u briew ba un rung sha ka jylla bad ban leit sha Itchmati.
Ha katei ka sngi, kaba kitei ki KSU ki la hiar sha katei ka jaka, la iohi ba ki bor Pulit ka Ri Bhoi ryngkat u ADC, ki la hiar mar mar sha katei ka jaka na ka bynta ban peit pyrman ioh shu mih kino kino ki jingjia kiba ktah ia ka shongsuk shongsain.
Haba kitei ki KSU ki leit sha katei ka jaka, ki rah artad bad shibun ki plakad kiba don ia shibun ki jingthoh pyrshah, kiba kdew ba kitei ki Bengoli ki dei ki riew poiwir poi hap na Bangladesh bad kim dei ban leit biang sha ka jaka kaba ki dei trai kata sha Bangladesh.
U samla Ferdynald Kharkamni, President ka KSU, NKHD, u la ong ba ka KSU ka pynrem jur ia u Chandan Chatterjee, Nongialam ka ABYSO, Kolkata, ha kaba u la ong ruh ba katei ka jingkren laplah jong u ia ka Jaidbynriew Khasi bad ia ka KSU, namar kitei ki jingkynnoh jong u, ki dei kiba ym don nongrim bad kiba u la shu kwah tang ban wanrah ka jingiapher jaid bynriew.
Shuh shuh, u la ong ruh ba utei u nongialam Bengoli um dei ban wan batai stad khlem da tip ia ki jingshisha da kaba shu sngap ne shong na Kolkata khlem da tip pat kaei kaba jia ha Itchamati, namar dei ki Bengoli na Bangladeshi kiba sah ha Itchmati, kiba la leh pyrshah ia ki Khasi bad kaba la shim wat ia ka jingim jong uwei na ki dkhot ba shitrhem ka KSU. Utei u nongialam ka KSU ha Ri Bhoi, u la ong ruh b aka KSU kan nym map ia kiba kren pyrshah ia ka Jaidbynriew Khasi, watla dei mano mano ne iano iano, namar ka nongrim jong ka seng hi ka long ban iada ia ki Paid Khasi kiba sah hapoh ka Bri u Hynniewtrep.
Namarkata, ka seng KSU ka dawa na ka sorkar Meghalaya ba ka dei ba kem ne pynhap ha ki kyndon ain pyrshah ia utei u briew, uba la kren beain i aka Jaidbynriew bad nalorkata u la dei ruh u briew uba kwah ban wanrah ia ka jingiasngew pher jaidbynriew, namar kumba kiwei ki jylla ki lah ban kem ia kino kino ki briew kiba kynshoit bad wanrah jingkulmar watla ki sah ha kawei pat ka jylla, kumta ka sorkar jylla ruh ka dei ban kem mardor ia utei u briew watla u sah sha kawei ka jylla.
Phi don ban ong eiei?