Kumba 72.37% ka jingpynpoi kor um sha ki longïing ha jylla, ong u Conrad

Shillong:U Myntri Rangbah ka Jylla Conrad K Sangma ha ka sngi Palei, ula ong ba ka Jylla ka la kynjoh ia u mawmer ba kyrpang da ka jinglah ban kot haduh 4,71,544 tylli ki Longïing kiba la ïoh ïa ka kor um ba treikam ha Ïing, kaba kot haduh 72.37%.

Ka Meghalaya ka la tam mynta wat ïa ka National Average ha ka jingpynpoi kor um ha ki thliew Ïing jong ka Jal Jeevan Mission (JJM) kaba la kot 72.1%.
Ka Meghalaya ka la nang beh ïa ka thong ban kynjoh ïa ka 100%, kaba pyni ia ka jingaiti met bad mynsiem jong ka kynhun ba pyntreikam ïa ka Jal Jeevan Mission (JJM) hapoh ka Jylla.

Haba pyntip ïa kane hapoh ka X (ba tip mynshuwa ka Twitter), u Myntri Rangbah ula ong, “Sngewkmen ban pyntip ba ka Meghalaya ka la kynjoh 4,71,544 (72.37%, ka jingtreikam ki kor um ïing kaba long palat ïa ka National Average ba 72.1%. Khublei shibun ïa ka kynhun @jjmmeghalaya kaba ïai bteng ban trei shitom ban pynthikna ba ka Meghalaya kan kynjoh ïa ka thong ba 100% ka jingïoh kor um ïing”.

Lah ban kdew hangne ba ïa kane ka Mission la sdang pyntreikam naduh u Nailar 2019 lyngba ka jingïatreilang ryngkat hapdeng ka Sorkar India bad ki Sorkar Jylla. Ka JJM ka la buh ïa ka thong ban pynïoh ïa ki kor um ïing ha baroh ki shnong Nongkyndong, ka ban pynthikna ba ki longïing kin ïoh ïa ka um kaba khuid shuwa u snem 2024.