U Bah Banteilang Rynjah uba dei u nongniah kali, u la ong ba u MLA u Ashahel D Shira bad uwei u nongbud jongu, ki la kura ia u haduh kumba 7 sien ei ei na ka bynta ka khlieh. “Ki la kura na khlieh, u MLA bad uwei uba bud ia u “, la ong u Bah Banteilang uba niah ia ka kali jong u ha ka jingiakren hynne ka sngi bad u Rupang.
U Bah Bantei uba shah sumar ha Civil Hospital Shillong u la iathuh mynne ba kane ka la jia ha ka por 4 baje janmiet ha ka sngi nyngkong katba u dang niah ia ka kali ban leit sha Meghalaya House ha Guwahati. “ha ka por ba dang sahkut kali utei u MLA u la hiar na ka kali bad ula shoh la kura ia nga na khlieh rynkat bad uwei u nongbud jong u”,la ong u Banteilang.
U la iathuh ruh ba ha katei ka por ba ki shoh ia u ki khlem kren eiei hynrei kila shu shoh beit ia u.
Katkum ka jingiathuh u Bantei ka jingshoh jong u ka lah ban dei ka jing bakla lynti watla ki khlem kren eiei ha ka por ba ki shoh ia u.
Ha katei kapor ba u leit buh ia utei u MLA la iadon lang bad lai ngut ki nongbud jong u, hynrei ki ba shoh ia u dei tang u MLA bad uwei nadpdeng ki nongbud jong u.
Watla u shah shoh hynrei u Bantei u la iathuh ba naduh ba u wanphai na Guwahati u la niah hi ma u ia ka kali haduh ban da poi Shillong.
Hadien ba u la shoh u khlem leit sha Hospital hynrei u la shong beit ha la iing bad dei hadien hynin ka sngi ba u la sngew pang jur, ka kmie jong u ka la leit buh noh ia u ban phah sumar ia u ha Civil Hospital Shillong.
U bantei u la iathuh ruh ba na ka liang u SP u la wan peit ia u bad u la ai jingmut ia u ba un ai noh da ka FIR hynrei ma u pat u la pynpaw ba um treh ban ai FIR ia utei u MLA.
Na ka liang ka kmie jong u Kong R.Rynjah i la pynpaw ka jingsngew lyngoh ba kat u MLA kumno un shoh briew hynrei I la ong ruh ba lada u bakla u dei ban sneng ban khraw hynrei um dei ban shoh ban dat haduh da mynsaw.
Phi don ban ong eiei?