Shillong: Kiba haiing hasem jong kiba shah kem na ka jingiakhih na ka jingjia na them Iewmawlong ryngkat ka Sur U Paidbah (SUP) ki la dawa ba ka sorkar ka dei ban pyllait noh ia ki, khlem kano kano ka jingbuh kyndon, kumba la kular hi ka sorkar.
Kiba ha iing ha sem jong kiba shah kem lem bad ki dkhot jong ka SUP, kiba kren sha ki kotkhubor, ha ka Sngi Hat Majai:Rupang
Haba kren sha ki lad pathai khubor mynta ka sngi, kiba la wan lyngba ka sur u Paidbah, kiba haiing jong kine kiba shah kem kiba bun ki longkmie, ki la kam ba ki khun, ki lok, ki para bad ki hymmen jongki shym la leh satia kumta hynrei la shu shah rah naphang ha ki pulit da kaba donkti ha ka jingther maw ha ka jingiakhih kaba la khie na ka jingshah shoh ki lai ngut ki khynnah Khasi ha ki khar metor ha ka 31 tarik Jymmang.
Mynta ka sngi, kine kiba haiing hasem, ki la wan peit ruh ia ki ha phatok ha Shillong District Jail. Katkum ka jingiathuh jongki, ki don kumba 68 ngut kiba la shah set mynta ha phatok kiba shah pynngat kyndon bapher bapher ha ki pulit.
U Bah Banraplang Hynniewta na ka Sur U Paidbah, u la ong ba kine ki samla kiba shah kem ki don mynta ha Shillong district Jail bad ki don baroh kumba 68 ngut kiba la shah pynngat kyndon ha ka ain halor ka jingkynnoh ba donkti ha ki kam ther maw ha ka jingiakhih ha Motphran kaba la jia naduh ka 31 tarik Jymmang haduh ka 4 tarik Jylliew.
“U Bah Lambor Malngiang u chairman ka State Planning Board ha ka jingwan iakynduh jongu ia ki paidbah ha ka 4 tarik Jylliew lem bad u Bah Banteidor Lyngdoh, bad u MLA ka North Shillong u Bah Adelbert Nongrum, u la kular ba ka sorkar kan pyllait noh ia kiba shah kem khlem kano kano ka kyndon bad dei halor kane, ba ka jingiakhih ka la thanda”, la ong u Bah Banraplang bad bynrap, “Kumba la kular ka sorkar ka dei ban pyllait noh ia ki khlem pynngat kyndon”.
Hynrei haduh mynta ka sorkar kam shym la pyllait ia kine ki samla kiba shah kem.
Kiba haiing hasem jong kito kiba shah kem, ki la iathuh ba kiba shah kem, kim shym la donkti eiei ban iather maw ne ban iakhih, hynrei la shu shah pharep bad shah rah ha ki pulit katba ki dang wan na jaka bylla tang namar ba kum iaid na katei ka jaka ha ka por ba ka don ka jingiakhih.
Kiba shah kem ki dei ki nongbylla, kiba niah kali saw, kiba niah auto, ki samla pule kiba dei na ka thain Mawlai, na Mawprem.
Katkum u Bah Banraplang ka sorkar ka dei ba kan pyllait noh ia kiba shah kem namar ba ki samla kiba shah kem ki la kylla sohpdung wat la kim don bynta eiei ha ka jingiather maw.
U la ong ba ka Sur u Paidbah ka dawa ruh ba ka sorkar ka dei ban weng noh ia ki khar metor na ka them Iewmawlong, bad ki don ka jingshaniah ha ka High Level Committee ba kan leh ia kane ka kam kumba la dawa u paidbah.
Ha kajuh ka por, u la ong ba kin leit iakynduh ia u Myntri Rangbah ka jylla u Conrad K Sangma, ia kiwei ki myntri sorkar ban dawa ba ka sorkar ka dei ban pyllait mardor ia kiba shah kem namar ba ka jingkem bad set ia ki ka la ktah ia ka iing ka sem kiba hap ban kamai ja ia ki khun ki kti, ki samla pule kiba dang pule.