Kumba 607% kiew ka spah u myntri pynroi sor, ha ki 5 snem

Shillong:Ka jingkheiñ kyllum jong ka spah jong ki 61 ngut ki kyrtong kiba dei ki MLA bad kiba ïakhun ilekshon biang ka la kiew da ka 77 per cent ha kine ki 5 snem ba la leit.

Na kitei, ki jingdon jingem jong u President ka UDP bad uba dei u Lamphang ka Ïingdorbar Thaw Aiñ u Bah Metbah Lyngdoh ka la kiew da 68 percent sha ka T 146.31 klur ha kine ki 5 snem ba la leit.
Katkum ka kaiphod jong ka Association for Democratic Reforms (ADR) and Meghalaya Election Watch, u Bah Lyngdoh, uba long uba riewspah tam na ki kyrtong ban ïakhun ïa ka MLA ilekshon 2023, uba la pynbna ïa ki jingdon jingem kaba T 87.26 klur ha ka por ïakhun ilekshon ha u snem 2018.

Katba u myntri rangbah ka jylla u Conrad Sangma ka kaiphod ka ïathuh ba ki jingdon jingem ka la kiew na ka T 5.33 klur ha u 2018 sha ka T 14.06 klur ha u 2023, kaba la kiew 164 percent.
Katba u myntri pynroi sor u bah Sniawbhalang Dhar u la dei uba la kiew bha napdeng kiwei ha ki jingdon jingem jong u ha ki san snem ba la leit kaba la long 607 percent.

U Bah Dhar, u ban ïakhun biang ïa ka elekshon napoh Nartiang konstitwensi kum u kyrtong ka NPP, u la pynbna ïa ki jingdon jingem jong u kaba long T 6 klur ha u 2018, hynrei ha u 2023, ka spah jong u ka la kiew sha ka T 45 klur kaba la long katkum ka jingpynbna jong u.
Katba ki jingdon jingem jong u myntri ki kam bording u James Sangma, u ban ïakhun biang napoh Dadenggre konstitwensi, ka la kiew da 568 per cent.
Ha ka ilekshon 2018, u Sangma u la pynbna ba ki jingdon jingem jong u ka long T. 7 klur. Ha u 2023, u la pynbna ba ka spah jong u ka la kiew sha ka T 53 klur.