Kumba 50ngut, ki leit rung jubor ha Hostel NEHU, ban thaw kulmar

Shillong:Ka jingkulmar kaba la mih ha ka miet sngi Nyngkong ha North Eastern Hill University (NEHU) Campus, ka dei namar ka jingïakynad hapdeng ki samla pule Khasi bad ki samla pule Garo nalor ki bar Jylla.

Kane ka la paw pyrthei na ka ejahar ba la mudui sha ki pulit ka Mawlai Police Station, da ki samla pule Garo kiba sah ha ka Hostel No.19 ne ka Rangira Hostel, kiba la ïathuh lut ïa kaei kaba jia ha katei ka miet.
Katkum kane ka ejahar, la ïathuh ba hapdeng 40-50 ngut ki samla pule kiba dei jong kiwei ki Hostel ka Campus, ki la leit rung jubor hapoh ka Hostel No 19, khlem da ïoh jingbit bad ki la shu shoh shu tied ïa ki samla pule kane ka Hostel haduh ba bun ki la mynsaw bad la pynkit sha Hospital ban ai jingsumar.

Kine ki samla pule ki pyntip ba mar mar, ki la pyntip ïa kane ka jingjia sha u Hostel Warden bad ki bor pahara ban tehlakam ïa ka jingjia bad ban ai jingïada ïa ki samla pule jong ka hostel No 19; hynrei la kynnoh ba kine ki samla pule jong kiwei ki Hostel, ki la kynjat ïa ka jingkhang bad kila rung jubor ryngkat ki tiar ki tar ba nep bad ktah kti ïa u Warden, ki Security bad ki samla pule, kaba lam sha ka jingmynsaw ïa ki katto katne ngut.

La kynnoh ba kine ki nongwan thombor, ki la wan da ka jingthmu ban thombor tang ïa ki briew, ki bym dei ki Khasi.
La kynnoh ruh ba kine ki nongwan thombor, ki la shoh naphang ïa ki briew tad haduh ka jingwan poi ki Pulit ba ki sa phet krad na kane ka jaka.
Kane ka ejahar ka la jer kyrteng ruh ïa katto katne ki samla Pule Khasi kiba donkti ban leit thombor bad kine ki dei u Friky jong ka Weinia Hostel, Meban (Weinia Hostel), Johny (Weinia Hostel), Wantei (Mawthadraishan Hostel) bad u Sam (Mawthadraishan Hostel).

Ka ejahar ka la pynpaw ruh ïa ka jingsuba kaba jur halor ka jingïadon bynta ki Hostel prefect, Assistant Prefect, Mess Manager bad Asst Mess Manager. La kynnoh ba dei kine ki briew kiba la ïasopsop bad ki samla pule Khasi na kylleng ki Hostel ban leh ïa kane ka kam pyntriem.
Kine ki samla pule, ki la pyntip ruh ba kane ka jingjia ha ka miet sngi Nyngkong, kam dei satia ka jingjia ba shu jia ryngkhat, hynrei ki nongsah ha kane ka Hostel ki la mad ïa ki jingshah byrngem byrsit ha kiba bun ki khep ha ki por ba la leit noh.
Kine ki samla pule, ki kyrpad ïa ki pulit ban shimkhia ha kaban leh eiei noh mardor ïa kine ki briew kiba donkti ha kane ka jingthombor khnang ban ai ka jingbishar kaba hok.