Kumba 30 tylli ki iing, yn pynpra ka MUDA ha Polo

Shillong, 13 Nailar:
Yn shah pynpra kumba laiphew tylli ki iing kiba tei beain ha Polo ha ka tnad Meghalaya Urban Developmennt Authority (MUDA), la ong u Secretary ka MUDA u Bah E Kharmalki haba kren hynnin ka sngi Balang bad u Rupang.
U bah E Kharmalki u la ong na ka liang jong ka tnad ka ladep phah ia ka jingthoh sha kine ki iing kiba shong tei beain hapoh Polo bad lada kam don da kumwei pat ne ka jingujor na ki trai ka jing pynpra kan iaid beit hadien ba kut une u bnai.
“Hapoh une u bnai lada ym don eiei shuh ka jingpynpra kan iaid beit”, la ong u bah E kharmalki.
Lah ban kdew ba ka tnad MUDA ka la dep phah shithi sha kumba 200 tam eiei ki jingtei kiba don ha ka thain Polo kiba lah ban shah pynpra namar ka jingskud jaka beain. Kine ki jingtei kynthup ki iing, ki dukan kiba ieng ha shi lynter ka phud wah Umkhrah.
Ka MUDA ka la leh ia kane hadien ba la ioh ia ka hukum na ka NGT ba ka dei ban pyndep ia kane ka kam hapoh lai bnai.
Kane ka kam ka dei kaba la sahteng la kham slem namar ba mynshwa ha ka por ba ka sorkar ka thmu ban pynpra hadien ba la ioh ia ka hukum na ka iing kashari, ki briew kiba shong ha katei ka thain, ki la ujor kylla bad ka kashari ka la phah pynsangeh noh shwa.
Ka la wan paw biang mynta hadien ka jingwan tuklar ka National Green Tribunal (NGT)  hadien ba la ioh ia ka jingujor na ki nongshong shnong ka sor Shillong kiba pynpaw ia ka jingjaboh kane ka wah namar ka jingleh jong ki briew.
Ka NGT ha ka jingbishar ha u bnai Rymphang, khlem pynslem, ka la pynmih ia ka hukum ba ka MUDA ka dei ban pynpra noh naphang ia ki jingtei bad ki iing ba shna bad skud beain ha lynter ka phud wah Umkhrah.