Shillong: Ha ka jylla Meghalaya ha kine ki 2 bnai ba ladep, kata naduh u bnai lber haduh mynta ka sngi ki sniang kiba la iap ha East Khasi Hills bad Ri Bhoi District ki long kumba 15 tylli na ka daw jong ka jingpang ka ba la tip kum ka “Classical Swine Fever”.
U Director jong ka tnad ri jingri jong ka sorkar jylla u GMRA Marak, u la iathuh ba kane ka jingiap jong ki sniang ha kane ka jylla kam shym la jia ha ka juh ka sngi, hynrei kala jia naduh shiteng jong u bnai Lber bad ka dang iai bteng haduh mynta ka sngi.
U la iathuh ruh ba 6 tylli ki sniang ki la iap ha Mawphlang bad u 1 ha Marbisu, hapoh jong ka East Khasi Hills District kaba hap hapoh jong ka Mawphlang C&RD Block bad 7 tylli ki la iap ha Zero Point bad u wei ha Umran Dairy jong ka Ri Bhoi District kaba hap hapoh jong ka Umsning Block.
U Dr Marak u la iathuh ban tip bniah ia ka jingiap ka jong kine ki sniang na ka liang ka tnad Veterinary Ki la dep ban leh ia ka post mortem ha Laboratory kaba don ha Lumdiengjri ha kaba la shem ba ka jingiap jong kine ki sniang kadei na ka daw jong ka jingpang kaba la tip kum ka “Classical Swine Fever”.
La shem ruh ba ka jingiap jong ki ne ki sniang baroh kiba la iap ki dei na ka juh ka jingpang, ia u ba iap mynta ka sngi ha Umran Dairy yn dang hap leh ia ka post mortern la shai ka sngi da ki doktor jong ka tnad veterinary ri yn sa lah ban tip ia kadaw jong ka jingiap.
La iathuh ruh ba kane ka jingpang jong ki sniang kan ym ktah ia ki briew.
Phi don ban ong eiei?