Kumba 1301 tylli ki kam bym pat thungkam ka MPSC, ong U MR

Shillong:U Myntri Rangbah ka jylla u Conrad K Sangma, haba jubab ïa ka jingkylli u Bah Process T Sawkmie MLA ka Mawlai Konstitwensi ba balei ka MPSC ka slem ban pynlong ïa ki eksam bad ban pynlong ïa ki interview kam, u la ong ba hap ban bud ïa kiba bun ki kyndon.

Ka MPSC ka dei ban pyntip ïa ka jingpynbna ïa ki kam ba lait, ban peitbniah ïa ki applikeshon, ban pdiang ïa ki applike shon, ban pynlong ïa ka eksamin, ban khot ïa ka interview bad kata ruh ka shong ha ka jingdon ki kam kiba lait.
Ka MPSC kam lah ban buh ïa ki kyndon, ïa ki kyndon la buh da ki tnat sorkar kiba phah ban khot applikeshon ha ki kam kiba lait bad ka MPSC ka bud ïa kita ki kyndon kiba la bthah ba hap ban pynbiang.
U Myntri Rangbah u la pyntip hapoh ka Ïing Dorbar Thawaiñ ba ki kam kiba ka MPSC ka dei ban khot pynlong eksam bad interview kiba sah bad ka MPSC ki don 1301 tylli, bun na kine ki kiba lait dei ha ka por COVID-19 kiba ym shym la lah pyndap ne thep kam.

Haba jubab ïa ki jingkylli bynrap, u Myntri Rangbah ka jylla u la ong ba ka jingslem ka dei na ka daw jong ka COVID-19 ha kine ki ar snem bad mynta ka la wan kane ka jingpyntreikam ïa ka jingpynbeit ryntih ha ka jingthung kam ha ki tnat sorkar.
U Myntri Rangbah u la ong ba ka sorkar ka la shim ïa ki lad ki lynti ban pynkhlaiñ shuh shuh ïa ka jingtreikam jong ka MPSC bad ban pynbeit ruh ïa ka rukom khot ïa ki eksam bad kumjuh ïa ki interview bad kawei ka long ban pynbun shuh shuh ïa ki jaka thoh eksam.