Kum u Gogoi ha Assam, rwai ki Congress ha Meghalaya:Bindo

Shillong, 30 Risaw:
U Senior Working President ka UDP u Bah Bindo Lanong  u la ong ba ka jingpyneh pathaw bad kam ki nongialam ka Congress ha kane ka jylla ban jop biang ha ka elekshon 2018, kan long thik kumba pyneh u Tarun Gogoi ha Assam, uba koppia ban rah beit ia ka thong hynrei shah syllad syndon ha ka BJP.
“U Gogoi shwa ka elekshon ha Assam u la kren kop ba ka Congress kan sar naphang hynrei ka jubab u paidbah ka long da khongpong”, la ong u Bah Bindo bad bynrap, hangne ha Meghalaya ruh ka jingkren kop ka Congress kan wan jia thik kumba jia ia u Gogoi ha kaba kin ai ia ka jubab.
Haba kren hadien ba la wai ka jingialang jong ka UDP Shillong City ha kane ka sngi Saitjain, u Bah Bindo u la ong “Ki paidbah ha kane ka jylla Meghalaya ki la tip ia ka jinglong ka Congress.  Hato kin bakla ia kane ban pynjop biang ia ka Congress ha 2018?,” .
Halor ka jingiateh bad kiwei ki seng sain pyrthei, u Bah Bindo u la ong ba ka por ka dang don bad ka party kan sa iashong jingialang ban iakren ban iapyrkhat halor kane ka kam.
Ha kajuh ka por, ka UDP ka la ther ia kane ka sorkar kaba la iada bad pynrieh tngen ia ki riew bamsap kumba la jia ha ka jyrsieh sialieh ha ka thungkam nonghikai haka jylla, ka bamsap u CEM ka JHADC u Madonbai Rymbai haduh T. 1.18 klur ia ka pisa jong ki paidbah ban ioh na ka bai khyndew.
“Hato ka sorkar ka dang leh matlah ia kat kane ka bamsap”, la ong u Bah Bindo.
“Ngi la iakren ia ka bamsap jyrsieh sielieh bad ngi la sngew khia jur ia kane halor ka jingsuki ban pynshitom ia ki briew kiba donkti ban pynlong langknia bein ia ki nonghikai”, la ong u Bah Lanong.
Ha kane ka sngi, ka UDP Shillong City ka la bynshet ruh ia ka kam Joint Secretary ia u Bah Joe Marwein uba la wan ban pyniasoh bad ka UDP hadien ba u la shong thait noh na ka kam shakri ha ka FKJGP.