Kum ki Nongmihkhmat ngim salia ban iarap ia kiba ngat COVID-19, ong U MLA Jirang

Nongpoh: Ha ka sngi kaba u Bah Sosthenes Sohtun, MLA ka Jirang, u la leit ban jurip sha baroh ki Longiing kiba la ngat ha u COVID-19 bad kiba don ha ki thain Khappud ka Megha laya-Assam, u la ong ba kum u Nongmihkhmat uba la jied da ki paid bah, um dei ban salia ha kaba leit ban jngoh sha kito ki longiing kiba la ngat ha u COVID-19.

Ha ka jingleit jurip da utei u MLA ka Jirang, la synranlang ruh da u Bah Victor Rani, MDC ka Jirang, ki briew ka koit ka khiah lem bad kiwei, ha kaba ki la leit ban jurip bad ai jingrap sha baroh kitei ki Longiing, kiba la don kiba haiing jong kiba la ngat ha u COVID-19.

Haba leit ban jngoh ia kitei ki longiing, u MLA ka Jirang, u la leit ban jngoh ia kawei ka jaka kaba don ha shnong 13Mer Tamulkuchi, kaba don haduh 4 ngut kiba ioh COVID-19, nangta sha Khanapara bad sha Baridua kaba uwei u briew uba ioh ia utei u juh u khniang jingpang.

Hadien ba la dep ka jingjeit jngoh ia kitei ki jaka ba don kiba ioh COVID-19, u MLA ka Jirang, u la pynlong ia ka jingialang hapoh ka shnong Baridua, ha kaba lyngba katei ka jingialang, ki la don ki nongialam shnong na katei ka thain, kiba la wan ban iashimbynta bad ban sngap ia ka jingai jingmut da utei u MLA.

Lyngba katei ka jingialang, u Bah Sosthenes Sohtun, u la kyntu ia ki nongialam shnong ba ki dei ban pynsngewthuh sha ki paidbah ha la ki shnong kaba ki don bad kata ka long ba ki dei ban pyrkhing ia ka rung ka mih hapdeng ki briew na Meghalaya bad Assam, namar katei ka thain ka dei kaba iajan eh bad ka Assam bad kaba ym lah ban tehlakam ia ka rung ka mih, lada ki nongialam shnong kim lah ban ai ka jingiatreilang.

Ka jingjop pyrshah ia u COVID-19 kam shong tang ka ka sorkar, ki Pulit ne ki briew ka koit ka khiah, hynrei ka jingjop kan wan tang lada baroh ki paidbah kin iatreilang bad bud ruh ia baroh ki jingbthah na ka sorkar.
Utei u MLA ka Jirang, u la kyntu ia kitei ki nongialam shnong ka thain Khappud, ba ki dei ban pyrkhing kumba ki la leh ha kito ki por ba sdang ka Lockdown, ha kaba ki nongialam shnong ki la trei shitom shisha na ka bynta ban pyrkhing ia ka rung ka mih kaba laitlan.

Ha kawei pat ka liang, utei u MLA ka Jirang, u la ai ka jingkitbok kitwriang ia baroh kito kiba la ioh ia u COVID-19, ba kin ioh kham kloi ia ka met kaba shait ba khlain.