Kulmar thlim ki paidbah ba shah jynrat naphang ki iing

Nongpoh, 16 Risaw:
Hadien ba ka Ingbishar ka Meghalaya High Court ka la hukum ban pynpra ia ki jingtei ban pynheh ia ka Umroi Airport ha Ri Bhoi District, mynta ka sngi ki pulit bad ki bor synshar ka district ki la pynlong ia ka jingjynrat naphang ia ki iing ha ka thain Umroi kiba pynwit ban pynheh ia ka kad liengsuin haduh ba ki paidbah ki la sah kyrdit khait.
Ki trai ba la shah ktah ha kane ka jingleit pynpra ki kynthup ia ka longing ka Kong Area Lyngdoh, Student Lyng doh, Risfully Lyngdoh Esria Lyngdoh, Debora Lyngdoh, Delina Khongsit, Lorita Lyngdoh bad Wingky Dohlieng na ka Umden Mission bad ka kong Bihrit Nongrum na Umden Umsaitprah.
Ki la pynpaw ba ba kane ka jingleh jong ki bor sorkar ka la long ka bym lah pdiang namar ba kim shem la iohpor bad dei tang hapoh 24 kynta ba ki la ioh jingtip ba ki dei ban weng noh ia ki jingdon jingem.
Ki katto katne ngut ki trai jaka ki la pynpaw ia ka jingsngewkhia bad ruh ia ka jingkyndit kaba jur halor kane ka jingthombor da ki bor sorkar pyrshah ia ki jingdon jingem jong ki khlem kano kano ka jingiatiplem.
Ki la ong ba watla kim don kano kano ka jingpyrshah ia ka jingthmu ba bha jong ka sorkar jylla ban pynheh ia ka Umroi Airport, hynrei kaba sngewkhia ka long ba ka sorkar jylla ka la shu leh khlem da ai ia ka por kaba biang ba kin lum ia ki tum ki tam.
Ki la ong ba ka sorkar jylla lyngba ki bor district ki la shu thom da ka bor ban pynjot pynpra ia ki, bad kane ka dei ka jingiuhroit ia ka jinglong briew man briew khamtam ka jingiuhroit ia ka hok ba kum ki paidbah ki deihok ban ioh.