Shella: Ka shnong Shella, myn hynnin ka sngi, ka la kulmar hi thlim bad ki la mih ki kynrum kynram ha kaba ki paidbah naduh ki rangbah bad ki longkmie ki la mih khrui ha madan ryngkat ki pla kad jong ki bad kim shah ban pynlong dorbar, ki la ia lum khrui hakhmat ka ing dorbar Shella ban ym ailad ia ki bor shnong ba kin pynlong dorbar. Katei ka jingjia ka la jia na ka daw ka kam Secretary Shnong. Katei ka dorbar ka la dei ban long ha ka sngi thohdieng jong ka taiew ba la dep, hynrei hadien ba ki bor District ki la ioh jingtip ba kan mih ka jinghuri hura, ki la pynjari noh da ka Section 144CrPC ka bym shah ban ia lum briew hynrei hadien ba la ioh bor na kashari la pynjari shnong ha Shella ba kan don ka dorbar mynta ka sngi.
Hadien ba la pynjari shnong ba ka Dorbar kan long ha ka por 12 baje mynta ka sngi, ki paidbah nongshong shnong ka Shella ki la mih khrui bad ki la ia lum lymbung hakhmat ing dorbar ban ym ailad ban pynlong ia katei ka dorbar Shnong. La iohi ba ki Majistor, ki pulit ki la ia lum khrui ban tem ia ki paidbah kiba ia pyrta ba kim ailad satia ban pynlong dorbar namar ba kim pdiang ban pynlong da kiwei pat ki briew lait tang u Secretary uba ka shnong ka la jied u bah Wanteikupar Wanswett. Ka jingpyrshah jong ki ia ka dorbar ka dei na ka daw ba ia katei ka dorbar la khot da u Assistant Secretary u bah John Stelin Youroin bad ki la ong ba kam ju dei ka rukom ba u Assistant Secretary un khot dorbar haba u Secretary u dang don.
Hadien kumba katto katne por ki paidbah ki la thanda bad ki la mih noh na katei ka jaka (ing dorbar) hadien ba u SDO (Civil) Sohra Sub-Division u bah L. Kynjing u la kren sha ki paidbah ba ia ka dorbar kaba la buh por ban long mynta ka sngi la pynsangeh noh bad u la ong ba ia ka kam shnong kam thaw hapoh katei ka shnong yn pynbeit pat da ka kashari hadien. U la kyrpad ia ki paidbah ba ki dei ban mih noh na katei ka jaka naba ka dei ka jaka kaba la pynjari ia ka section 144CrPC. U la pyntikna ruh ba kiwei pat ki liang kiba ki paidbah ki pyrshah kin mih noh na katei ka jaka naba la khang ban pynlong dorbar.