Kulmar sa ka UDP, ba bun eh ki nong ia knieh tiket na Sohiong

Shillong, 4 Risaw:
Ka UDP haduh mynta kam pat lah ban shim ia ka rai kaba khadduh iano kan ai tiket MDC elekshon shiteng samoi na Nongspung-Sohiong konstitwensi. Haba kren sha ki nongthohkhubor mynta ka sngi u President Election Committee ka UDP East Khasi Hills District u bah Titos W Chyne, MLA u la ong ba ki don 4 ngut ki kyrtong kiba la pan tiket na katei ka seng bad haduh mynta katei ka seng kam pat lah ban rai iano kan ai, hynrei u la ong ba sa tang shisngi ar sngi kin shim noh ia ka rai kaba khadduh bad dei namarkata la khot ia ki ban ia kren pynbeit khnang ba hadien kan ym mih kano kano ka jingsngew pher jingmut lada ioh tiket mano mano ruh.
Ki 4 ngut kiba ia knieh tiket na katei ka seng ki long u bah R.A Lyngdoh uba ki ju khot ieid u bah Tin, u bah Fedrick Lyngkhoi,u bah Wankupar Syiemlieh bad u bah Braston Kharphuli. Lah ban kdew ba u bah R.A Lyngdoh u dei u MLA bad MDC barim ka Sohiong, u bah Wankupar Syiemlieh u dei u kyrtong MDC ka UDP na Sohiong ha u snem 2014 uba la shah rem salit ha u bah HDR Lyngdoh katba u bah Braston Kharphuli pat u dei u kyrtong MLA ka UDP ha u snem 2013 bad u la iakhun para marwei ha katei ka elekshon kum u kyrtong monlang bad u la shah rem ha u bah HDR Lyngdoh.
Kitei baroh 4 ngut mynta ka sngi ki la kren sha ki nongthohkhubor ba ki hun lada jia ba ioh tiket mano mano ruh napdeng jong ki bad ki kular ba lada ioh tiket mano mano ruh kin kyrshan ia u kyrtong jong katei ka seng. U bah Braston u la pynthikna ialade ba lada jia ba um ioh tiket ruh un kyrshan beit ia ka UDP hynrei u la ong ba um lah pat ban tip kumno kiwei pat ki paralok para ia pan tiket jong u kin leh, hynrei kitei ruh ki la khlei ba kin kyrshan tylli ban pynjop donburom ia u kyrtong ka seng UDP lada ioh tiket mano mano ruh. Kitei ki kyrtong ki la kren sngewthikna ba mynta ka kynti ka UDP ka don ka jingkyrmen kaba skhem ban jop na Sohiong konstitwensi bad ki shim ba ka jingiakhun mynta kam dei shuh bad u bah HDR Lyngdoh ne u ‘Maheh’ hynrei ka jingiakhun ka long bad u khun jong u. La kylli na kitei ki 4 ngut hato kumba long mynta ki la iaid ne-em sharum shaneng ban ia lap ia riew ia ki paidbah , ki la jubab ba ki ju iaid lang baroh 4 ngut ha ki jingialang bapher bapher ba la pynlong da katei ka seng.
U President Rangbah katei ka seng u Dr.Donkupar Roy haba kren shaphang ka rukom jied kyrtong jong ka seng UDP, u la ong ba ka rukom jied ia u kyrtong ka long nyngkong eh ki peit ia u briew uba don jingkyrmen ban jop bad ki peit ruh ia u briew uba don jingshaniah hapoh ka seng.
Haba phai sha kitei ki 4 ngut u la ong ba baroh ki don jingkyrmen ban jop bad ki dei kiba la shaniah da ka seng hynrei ki dang hap ban peit uno uba kham don jingkyrmen shuh shuh napdeng jong ki. Ha katei ka jingiakren bad ki nongthoh khubor nalor ki 4 ngut ki kyrtong , Dr.Don bad bah Titos la donlang ruh u Secretary ka Election Committee EKH u bah Teiñwell Dkhar, MDC bad u bah Hamlet Dohling.