Kulmar ki nongialam shnong, ba rai pynthymmai Rangbah Shnong

Jowai:Ki Nongialam shnong ka shnong Umstain kaba don ka Elaka Narpuh East Jaintia Hills ki la dap da ka jinglyngngoh kaba khraw halor ka rai jong ka Ophis ka Administrative Department ka JHADC ban pynlong noh ia ka Elekshon ban iajied thymmai ia u Rang bah Shnong ha katei ka shnong.

Katkum ka jing iakren bad ki Nong ialam Shnong katei ka shnong Umstain ki la iathuh ba dei ha ka 29 June 2019 la pynlong ia ka election hapoh ka jingpyniaid u Dolloi, ma Manbha Kyndoh bad u Secretary ka Elaka.

Ha kane ka Election la jop u ma Robi Suchiang bad ha ka 25 July ha utei u snem la ai sanat ia u ma Suchiang kum u Rangbah Shnong ba pura.

U Rangbah Shnong barim u la shah rem noh ha katei ka por hynrei u la leit buh ia ka jingujor da kaba ong ba um hun satia ia ka jingpyniaid ia katei ka Election 2019 wat lada u Daloi u la iathuh ba kam shym la don kano kano ka jingkulmar ha ka por ba la pynlong ia ka Election.

Utei u Rangbah Shnong ba la shah rem u ma Victor Suchiang u la ujor sha ka JHADC ha ka 13 tarik u July, 2019 ar sngi shwa ban ai Sanat ia u Rangbah Shnong ba la jop thymmai.

Naduh ka 13 tarik haduh ba la sdang sa ka lockdown ha u bnai March ka bor badei peit ka JHADC kam shym la shim kano kano ka rai halor katei ka appeal lane ka jingujor jong u Rangbah shnong barim.

Na ka liang u Dolloi ruh u la ong ia ki paidbah ba unla dep ban ai ka jubab sha ka district council halor katei ka appeal jong u bad na ka liang ki nong shong shnong ruh ki la hun.

‘’Hynrei kyndit ha ka sngi palei ba la dep la ai ktien sha ki rangbah ka shnong da u dolloi ba kan don ka jingiajied Rangbah shnong ba thymmai’’, la iathuh u rangbah shnong uba mynta u ma Robi Suchiang ha ryngkat ka jingiadonlang ki dkhot ka Executive Member baroh.

Khlem kano kano ka jingthoh bad khlem kano ka jingshahweng ne sospon u rangbah shnong ba mynta uba dang shakri tang kumba shisnem tam katba ka kyndon jong ka JHADC ka samoi treikam ka long 3 snem.

Ha kane ka sngi Palei, ka AO jong ka JHADC ha ryngkat u Dolloi ki la wan hiar sha katei ka shnong ban pynlong ia ka Election hynrei namar ka jingpyrshah ki paidbah bad ruh ki nongialam shnong, la pynpep noh ia katei ka jingthmu.