Kulmar khlieh U Mukul, ba ia treilang ki seng trai Ri:Dr Don

Shillong, 4 Jylliew:
“Nga sngew sam-mut, halor ka jingong jong U Mukul Sangma, ba ka UDP, ka don ka jingiadei kaba na kyrpong iing bad ka BJP” ong U Donkupar Roy President ka UDP, ha ka jingpynmih khubor mynta ka sngi.
“Ngi ngeit ba ka jing ia trei synrop, ha shwa lane hadien ka elekshon, kam ju don kata kaba ki ong ka kyrpong lane ka jingkhang bah” ong U Dr Donkupar Roy.
U Mukul Sangma, u don ka jingkulmar khlieh, hadien ka jingiatreilang jong ka UDP bad ka HSPDP. Baroh ki iatip, ba kam don satia ka jingiateh paralok shwa ka elekshon bad ka BJP, ong shuh u nongialam ka seng UDP.
U Dr Don,u kylli shuh, ba balei ba ka Congress, kan kynnoh ia ki seng trai ri, halor ka jingkiew jong ka BJP bad ka dei ka jingbym larkam ka seng Congress, ba ka kiew stet ka BJP ha ka Ri bad ha ki Jylla bad la ai nuksa ia ka Assam, ha kaba ki don bun ki nongialam Congress, kiba la kynriah sha ka BJP. Ha Meghalaya, ki don bun ki Congress, ki ban leit iasoh sha ka seng BJP, ha kaba ha Shella, ki don ki nongialam Congress, kiba leit BJP bad ha Sohra ruh, la pyni ba u nongialam ka Congress, U Dr PW Khongjee, u leit iasoh BJP bad kumta kam dei satia ka UDP, kaba ai bor ia ka BJP, hynrei ka dei ka jingbym larkam jong u myntri rangbah , kaba pynlong ia ki dkhot jong katei ka seng, ba kin iasoh sha ka BJP. “Lada ka BJP, ka kiew ha Meghalaya, ka dei namar ka jing bym larkam jong u myntri rangbah bad ka seng jongu” bad U Dr Donkupar, u ong shuh “Ha Meghalaya, ngi thikna ba ki seng trai ri, kin thaw sorkar ha ka elekshon 2018”.