Kular U SE Jowai ia ka surok Borghat

Shillong, 5 Jylliew:
Hadien ka jingshim sting palat ka tnad PWD Khlihriat Sub Division ban tukar bad ban mara mot ia ka surok kaba la shah tap khyndew naduh ka 31 tarik u jymmang bad ka bym shym la leh eiei haduh mynta ruh kaba la pyndik ia ka leit ka wan u paidbah, ki nongialam shnong jong ka shnong Borghat mynta ka sngi ki la leit ban ia kynduh ia u SE Jowai Circle PWD ban pynsngew ha u ia ka jingdonkam kyrkieh ban weng noh ia ka jingeh u paidbah katei ka thain. Ha katei ka jingiakynduh u SE u la kular ban shimkhia noh ia katei ka kam bad lashai hi ka sngi, un phah ia ki briew jong u ban leh ia kaba donkam.Ki nongialam shnong ki la kyrpad ruh ia ki nongmihkhmat katei ka thain ba ki dei ban peit bad thaw ia ki lad ki lynti ban iada na ka jingtwa khyndew kaba ju jia ha katei ka thain. Kane ka long katkum ka kyrwoh na u Secretary shnong Borghat u bah P.Khongthaw.