Kular u myntri khlaw, ban pyllait noh ia u mawshun

Shillong, 16 Rymphang:
Ki nongtrei Mawshun na ki thain Shella, Mawlong bad Bholaganj mynta ka sngi ki la ia kynduh ia u myntri ka tnad khlaw jong ka sorkar Meghalaya u Clement Marak ban ia kren halor ka kam trei mawshun kaba la khang mynta.
Ha kane ka jingiakren bad kane ka kynhun kaba la ialam da u bah Stodar Dkhar bad u Bah Paskha Malangniang lem bad ki riew rangbah na ka thain, na ka liang jong u myntri u la shah shkor ia ka jingkren ka jong ki bad ia ki jingeh kaba ki briew katei ka thain ki la ia kynduh naduh ba khang kane ka kam trei Mawshun.
Ka jingiakren ha kane ka jingiakynduh bad u myntri jong ka sorkar ka long ba ki la kyrpad ia u myntri ban pynlait noh ia ki mawshun kiba dang sah ia kaba la tip kum ka stock halor kane u myntri u la kular ba yn sa pynlait noh ia ka stock kaba dang sah.
Ha kane ka jingiakynduh na ka liang jong u myntri u la twad jingmut ruh na ki briew ka thie ka thain kiba trei bylla ha kane ka kam Mawshun bad na ka liang jong ki ruh, ki la pynsngew ia ka jingeh ha ka ioh kam ioh jam ha dien ba la khang kane ka kam trei mawshun.
Na ka liang jong u myntri u la shah shkor ia ki ha kane ka jingiakynduh bad u la ai ka jingkular ba yn sa leh noh ia kane ka kam ban pynlait noh ia u Mawshun ba dang sah mynta bad kane ka long ka sien kaba nongkong ba u myntri ka tnad khlaw jong ka sorkar jylla u la ioh ban ia kren bad kiba trei bylla bad ki trai par kiba trei ia kane ka kam mashun.